Pyrshah ka HSPDP ïa ka jingthmu ka Sorkar MDA ban wanrah Casino
U Bah Sanjied u Kyrtong ka Seng na Nongstoiñ
Shillong, Nailur, 06: Ka Central Executive Committee jong ka Hill State People’s Democratic Party ka la rai ban pyrshah ïa ka jingthmu jong ka Sorkar Jylla ban pyntreikam ïa ka Meghalaya Gaming Act, 2021 khamtam eh ha kaba ïadei bad ka jingthmu ban wanrah ïa ka Casino.
Ha ka jingïakren bad ki lad pathai khubor, u President jong ka HSPDP u Bah K.P Pangniang u la pyntip ba ka party kan pyrshah beit ïa ka jingthmu jong ka Sorkar Jylla ban pynmih da ka jingpynbna ban pynjari ïa ka Civil Procedure Code bad ka Criminal Procedure Code hapoh ka Sixth Schedule Area.
Ha kajuh ka por, u la ong ruh ba ka party kan sa tei da u durmot jong u nongïalam baradbah u Bah Hoping Stone Lyngdoh ha ka shnong Mawphanlur, West Khasi Hills district.
Shuh shuh u la pyntip ba ka HSPDP kan sa pyllait paidbah ïa ka Manifesto na ka bynta ka Elekshon sha ka Ingdorbar Thawain ka ban sa long ha u snem 2023 ha ka taiew banyngkong u bnai Risaw.
U Bah Pangniang u la ïathuh ba ka HPDP ka la rai ban pynbna ïa ka kyrteng jong u Bah Sanjied Shangrit kum u kyrtong u ban ai reng na Nongstoiñ Constituency ha ka elekshon sha ka Ingdorbar Thawaiñ ka ban sa long ha u snem 2023.