Shillong, Jylliew, 24: Ka seng kieng atiar Hynñiewtrep National Liberation Council (HNLC) ba la shah kheiñ beaiñ ka la pyrshah jur halor ka jingtyrwa ban jer ïa ka viewpoint ha Sohra ha ka kyrteng jong u Raja Raghuvanshi, u nongjngohkai pyrthei na Indore uba la shah pynïap ha Sohra.
Ïa kane ka jingtyrwa, ba la phah da u riewshimet uba kam ïalade kum u dkhot ka BJP, ka HNLC ka la ñiew ba ka long, ‘kaba pynlehraiñ bad ka bym burom”.
Ha u kyrwoh, u General Secretary ka HNLC Bah Saiñkupar Nongtraw u la kynnoh ba u nongtyrwa u kham sngewdei ban ai jingmyntoi ai ka BJP, ïa kaba katkum ka jingsngew jong u, ka dei ka party kaba kyntiew ïa ka niam Hindu bad ka saiñpyrkhat Brahmin.
“Kino kino ki ritpaid kiba pynïasoh bad ki seng saiñpyrthei na rithor, kum ka BJP, NPP, Congress, ne TMC ki ladep ban pyndem lypa ïa ka snap ba paka jong ki,” ong u Bah Nongtraw. “Ki la shah pynsngewthuh bakla da ka rukom pyrkhat Hindu, ka rukom pyrkhat ban shu dakhol, bad ka jingpyrkhat mraw.”
Ka HNLC ka la dawa ba kano kano ka jingtei sahnam ne ka viewpoint ha Sohra dei ban ainam ïa ki martir, ki shipai, bad ki Syiem jong ka jaidbynriew Hynñiewtrep, kiba la len lane bad kiba la ïakhun na ka bynta ka burom bad ka jinglaitluid jong ka ri jong ki.
“Ban iehnoh ïa ka pateng jong ki tang na ka bynta ki briew kiba nabar ka long ka jingibeiñ,” la ong u Bah Nongtraw.
Related Posts
“Ngi kyntait jur ïa kane ka jingtyrwa kaba pynlehrain bad kaba khlem burom. Ka Sohra kam dei ka jaka ïa ki briew kiba nabar ban pynsah jingkynmaw khamtam ym ïa u nongjngohkai pyrthei uba la wan bad ïap ha ka por bym poi pyrkhat. Lada dei ban pynsah jingkynmaw, dei ban ai burom ïa ki martir, ki riewshlur bad ki Syiem kiba la len lade na ka bynta ka ri jong ngi bad kiba la ïakhun ban pynïoh laitluid ïa ka jaitbynriew Hynniewtrep,” u la ong.
Ka HNLC ka la kynthoh ruh ïa u nongaiktien jong ka BJP u Bah M. Kharkrang halor ka jingkyntait ba ka jingai nam ïa ka Viewpoint ka dei ka shi bynta na ka mat jong ka seng.
“U James Syiemiong um shym la kren kum u nongshong shnong, u la pyndonkam ïa ka shab jong ka BJP ban pynkhih ïa ki buit treikam ka BJP da kaba riehtngen ha ka ‘jingsngew shimet’,” la ong u Bah Nongtraw.
U la kynnoh ba ka jingsngap jar jong u Bah Kharkrang halor kane ka ishu ka ïathuh, bad ka jingkham jan jong u sha ki nongïalam ha Delhi ban ïa ki paidbah.
U Bah Nongtraw ula kynthoh ruh ïa ka jingsngap jar jong u Bah Kharkrang halor ka jingpyndonkam ïa ka shab jong ka party. “Lada u Bah Kharkrang u ngeit shisha ha ka jingsynshar kaba khuid balei u shu sngap jarï Balei um pynrem mardor ïa kane ka kam bad ban kyntait mardor ïa ka jingshah pyndonkam bakla ïa ka shab jong ka party bad ban panmap na ki paidbah,” la buh jingkylli u Bah Nongtraw.
Ka HNLC ka la kyntu ïa ki paidbah ba kin ieng pyrshah ïa kane ka jingshah ibeiñ bad ban ïada ïa ka burom jong ka ri jong ki da ka jingïatylli, da ka jingshlur bad da ka jingshit rhem ba ïaineh. “Ngin ym ailad ba ka khyndew ba kyntang jong ngi kan kylla long ka jaka sah jingkynmaw ïa ki briew kiba nabar katba ïa ki martir lajong bad ïa ki nongïaleh laitluid la shu leh matlah bad la shu klet noh,” ong u Bah Nongtraw.