Pyrshah ka EC Lympung Ki Hynriew Shnong ïa ka jingthmu ban pynlong aiñ ïa ka Khalai

Shillong, Jymmang: Ka Executive Committee jong ka Lympung Ki Hynriew Shnong kaba la ïakynduh ha ka 7 tarik mynta u bnai ha Khasi National Dorbar Hall, Mawkhar Shillong ka la ïatai sani bha halor ka jingpynbna jong ka Sorkar Jylla ba la pynlong aiñ ïa ka jingkhalai lyngba ka “Meghalaya Regulation of Gaming Act 2021.
Ka Lympung Ki Hynriew Shnong kala pynpaw ïa ka jingsngewsih bad sngewkhia mynsiem haduh katta katta ba ka Sorkar Jylla kan shah ban plie ïa ki Casino (Jaka Khalai) hapoh ka Jylla. Ha kum kine ki jaka don ruh kiwei kiwei pat ki jingpynbyrngia ki ban ktah ïa ka imlang ka sahlang bad ka ban pynthohbria ïa ka jaidbynriew ka jong ngi hi baroh kawei.
Kumta na ka liang ka Lympung ka sngewdei ban kyntu ïa ka Sorkar ba ka dei ban pynkhlaiñ ïa ki lad kamai pisa jong ka da ki lad ki lynti ki ba dei ym da kiwei pat ki lynti ki bym dei ki ba wanrah pynban ïa ka jingshong syier ïa ka imlang ka sahlang.Ha kajuh ka por ka Lympung Ki Hynriew Shnong ka dawa ruh na ka Sorkar ban weng noh mardor ïa kane ka aiñ.Kane ka long katkum u kyrwoh lyngba u Bah Paul J. Sawian bad Farewell Nongkynrih, President bad Secy. ka Lympung ki Hynriew Shnong.