Pyrshah ka AHPUF ïa ka jingthmu pynkhalai biang ïaka Lucky Draw ka Chi Iung

Jowai, Risaw 14: Ka All Hynñiewtrep People United Front (AHPUF) kala mih shakhmat ban pyrshah ïa ka jingthmu jong ka ‘Chi lung Multipurpose Society’ ban pynkhalai biang ïa ka First Prize jong ka Lucky Draw ha kine ki nongrim kiba ka seng kam sngew ïahap.
Ka seng AHPUF kala ong la dep pynkhalai ïa ka first prize jong ka Lucky Draw jong ki ha ka 28.09.2024, ha kaba ki la pynbna ïa ka result jong ka first prize kaba dei 316592 bad da ki phew hajar ngut ki paidbah kila bret ïa ki tickets jong ki namar ba ki la pynbna ïa ka number ba pom.
Hynrei ha ka step, 29.09.2024, ka Chi lung Multipurpose Society, kala pynbna ba ka don ka jingleh thok ha ka jingpynkhalai ïa ka first prize, kumba ki la pynbna ha ki Social Media Youtube chanel ba kyrteng’ R. Ryngkhlem’, u K. Lamurong ula ong ba ka don dien ktha bniat bad lah sniew dur bad um i kop shuh ba dei ka ticket ba dang thymmai, ka rukom shim ïa ka ticket ruh ka pynartatien ïa ki paidbah.
Kat kum ka jiungphla jong ki khynnah ha ki lad pathai khubor ki ong ba ki buhrieh ïa ka ticket ha pohkjat, ka ïa pher ka jingong jong ka Chi iung ba ki ong ba don dien ktha bniat, ka mut ba ki buhrieh ha poh ktien.
Ka Chi Iung Multipurpose Society ka pynbna ban pynkhalai biang ïa ka first prize khlem da pyrkhat pat ïa kito ki phew hajar ngut kiba lah bret tickets, namar ba ki lah pynbna ïa u number ba pom ha ka 28.09.2024.
Halor kane ka seng kala dep buh jingthoh ruh ha ka 07.10.2024 ha Jowai Police Station halor kane ka kynrum kynram jong ka Lucky Draw jong ka Chi Iung Multipurpose Society. Na ka liang ka Seng AHPUF kala dep ïa kynduh ïa ka Team Chi Iung Multipurpose Society ha ka office trei kam jong ki ha ka 10.10.2024.
Ha ka jingïakren, ka seng kala kyrpad ïa ki ba kin print tickets biang bad sam sha kito kiba la dep thied tickets, daka bthah ïa ki paibah ban pynphai ïa kito tickets jong ki bad ban shim da kiwei, kumjuh ruh ïa kito kiba la bret tickets, da kaba buh por ïa ki nangta sa pynkhalai biang. Na ka liang jong ka team Chi lung Multipurpose Society kim pdiang ïa ka jingai jingmut jong ka seng bad kila ong ba kin pynkhalai biang khlem da print ticket biang.
Ka seng ka dawa ba lada kim lah ban print tickets biang, dei ban aiti noh ban pynïaid da ka office jong U DC ban leh ïa kaba donkam lane ban donate ïa kane first prize sha ki jaka ri khunswet.
Halor kine ki nongrim ka seng All Hynñiewtrep People United Front (AHPUF) ka pyrshah ïa ka jingthmu jong ka Chi Iung Multipurpose Society ban pynkhalai biang ïa ka first Prize lada kam lah ban ai tickets biang ïa kito kiba lah bret tickets.
Kumta ka Seng kaba trei na ka bynta ka bha ka miat ka imlang sahlang bad ka hok u paidbah, ‘ngim lah ban pdiang ba u paidbah un duh ïa ka hok jong u’ halor kane ka seng ka ngeit skhem ba ki bor District kin peit bniah bad tuklar lem ïa kane, khnang ba nangne shakhmat kam jia shuh kumne, pynkut ka kyrwoh na u ma John Phawa President bad u Secretary ma W. Langwar Secretary ka All Hynñiewtrep People United Front (AHPUF).