Pyrshah ka AHPUF ïa ka jingthmu ki Chi Ïung ban pynkhalai biang ïa ki ticket Lucky Draw

Jowai, Risaw 05: Hadien ba la mih ki kynrum kynram na ka daw ba la don ka jingsuba jur leh thok leh shukor ha ka jingpynkhalai ïa ki ticket Lucky Draw jong ki Chi Ïung Multipurpose Society ha ka jingïadei bad ka Frist Prize kaba la buh da ka Dumper Truck.
Ka seng All Hynñiewtrep People United Front (AHPUF) kam sngew ïahap ïa kane, ha kaba ka la mih shakhmat ban pyrshah jur ïa ka jingthmu ne ka rai jong ka Chi ïung Multipurpose Society ban pynkhalai biang ïa ki ticket ha ka jingïadei bad ka First Prize.
U President ka AHPUF u John Phawa, u la ong ba hadien ba la mih da ki phew phew hajar ngut ki briew kiba la ud la nam kumjuh ruh kiba la complaint ha ka jingïadei bad kane ka kam, kumta ka seng kam sngewlah shah ban kut tang ha ka jingkhñium, ha kaba ka la mih shakhmat ban ïeng na ka bynta ka hok jong ki lak lak ngut ki nongshong shnong ka ri Khasi Jaiñtia kiba shah thok ha kane ka kam.
La ong ruh kumno yn pynkhlai biang ki ïa ki ticket ka First Prize haba kiba bun na ki paitbah nongthied ki la dep ban bret lut ki ïa ki ticket jong ki?.
Lada kito ki nong pynïaid ki lap ba don ka jingsuba lehthok leh shukor, te ki la dei ban pyndam ne sangeh ban pynbna ïa kato ka ticket number kaba dei jong ka first prize. Lada ki ong ba don ki dak bniat lane ka la jhieh kato ka ticket, ha ka jingshisha ki dei ban tip ha kato hi ka por ba ka jhieh kato ka ticket, hynrei hadien ba la slem ka por kaba la dei ban rkhiang bad jah kato ka dak bniat bad tip pat ba ka jhieh? Katba la ïohi pat ki la pynbna ha ka step kaba bud, kaba kim pdiang ïa kato ka ticket number kaba pom ïa ka first prize. Kane ka pynsuba ïa ki paidbah ba don kaei re kaei sha lyndet.
Kumta ka seng ka la pyrshah jur ïa ka jingthmu kane ka Society ban pynkhalai ar sien ïa ka first prize namar kila dep ban pynbna ïa ka number ba pom ïa ka first prize, ha kaba bun ki paidbah kiba dep ban thied ticket ki la dep bret lut ïa ki ticket jong ki. Kumta kumno yn tip ban wan kam ïa ki prize haba ïa ki lyngkhot kato ka ticket ki la dep bret? Kumta ka seng ka la rai ban leit ai da ka complaint sha ki bor jong ka aiñ ban bishar ïa kane khnang ba ki paidbah kiba thied ïa kine ki ticket kin ïoh ïa ka hok ka jong ki.
Shuh shuh ka seng ka la ong ruh kumno ha kato ka miet ïa ki khynnah ban jied ïa ki ticket ruh ki long lypa kiba la dep buh shwa, khlem da jied naphang ha man la ki round jong ki Prize ha kato ka miet. Sa kawei ruh balei khlem tohkit bniah ïa uto u khynnah uba la klah ïa ka ticket jong ka 1st Prize kaba la don ka jingsuba. Na ka liang ka seng kan nym shong kli kti, hynrei kan ïaid shakhmat na ka bynta ba ki paidbah kin hun mynsiem bad tip ïa ka hok jong ki, ong ka kyrwoh ba la phah da u John Phawa President ka AHPUF.