Pyrshah ka ACHIK ia jingdawa thaw ïa ka MRC ha Garo Hills naba kan phiah ïa ka jaitbynriew

Shillong, Nohprah 13: Ka A·chik Conscious Holistically Integrated Krima (ACHIK) ka la pynpaw ka jingpyrshah kaba jur ïa ka jingdawa ban thaw ïa ka Minority Regional Council ha Garo Hills, da kaba khot ïa ka kum ka jingpynphiah, ka bym don nongrim bad kaba don jingma ïa ki kam longshwa manshwa ka kolshor bad ki hok kiba hapoh ka riti synshar ka ri na ka bynta ki trai ri trai muluk ki paid A·chik.
Ha ka kyrwoh khubor ka ACHIK ka la khmih ïa kane ka jingtyrwa ka council kum ka jingïaleh ïa ka Sixth Schedule jong ka riti synshar ka ri India, kaba ithuh ïa ka jinglong laitluid bad synshar ïalade ki nongshong shnong riewlum ha Garo Hills.
“Kane kano ka jingpyrshang ban thaw la ka jong ka Minority Regional Council hapoh kane ka rukom treikam kam dei tang ba ka ktah hynrei ka long ruh kum ka jingïakhun bad ïaleh ïa ka mynsiem bad ka jingthmu jong ka Sixth Schedule,” ong ka kyrwoh khubor.
Ka ACHIK ka la pynrem ïa kane ka jingkren bad ki kam jong ki riew shimet bad ka kynhun kaba dawa ïa ka council, da kaba pynïaryngkat ba kane kadei ka kam ba la shah pynbeij ha ka kam saiñ hima sima, kaba la pynwandur ban wanrah ka jingïaumsnam jaitbynriew bad kaba thmu ban wanrah jingpait jingpra ïa ka jinglong shipara ha ka imlang sahlang.”
“Ngin pyrshah beit ïa kano kano ka jingthmu ïa kane- la ka dei ha ka saiñ pyrthei ne bor pynïaid sorkar kiba wan ban pynhiar dor ïa ki hok jong ki trai ri trai muluk ne kaba pynngam noh ïa ka bor jong ka Garo Hills Autonomous District Council (GHADC),” ong ka ACHIK.
Ka organization ka la kyrpad ïa ki nongshong shnong A·chik, ki kynhun sengbhalang, bad ki nongïalam shnong ba kin ïai long kiba peitngor bad ïalong kawei pyrshah ïa kine ki agenda ba wanrah jingïapait ïapra, bad ban pynthikna ban don ka suk ka saiñ, ka hok ka sot bad ka jingïada ïa ki hok ki trai ri trai muluk ha Garo Hills.