Shillong, Kyllalyngkot 12 : Ka All A’Chik Youth Welfare Society (AAYWS) ka pyrshah jur ïa kano kano ka jingthmu ban shah ïa ki bar jylla ba kin ïakhun kum ki kyrtong ha ka elekshon MDC ban wan ka Garo Hills Autonomous District Council (GHADC).
Ha ka kyrwoh, u President ka AAYWS Zingzing N Sangma ula ong “Ngi dawa jur ba tang ki kyrtong riewlum ba dei ban shah ba kin ïakhun bad mihkhmat ïa ki paidbah ha GHADC. Ka jingailad ban ïashim bynta ki bar jylla kan pyntroiñ ïa ka jingthmu jong ka jingsynshar laitluid bad ka lah ban lam sha ka jingshah pynïaid ki jaka puta ki riewlum ha ki briew ba nabar, ki aiñ tynrai, bad ki rukom synshar tynrai, ka bym lah ban pdiang satia da ka Jaidbynriew Garo”.
Ka Seng ka kyntu ïa ki bor khmih bad ïa ka Election Commission ba kan bat ïa ka Sixth Schedule jong ka Riti Synshar ka Ri, bad pynthikna ba ka hok ki riewlum ka ïoh jingïada.
“Ka AAYWS ka kyntu ïa ki bor khmih bad ia ka Election Commission ba kin bat skhem ia ki kyndon jong ka Sixth Schedule bad ban pynthikna ba ym dei ban ïapeiñ ïa ka hok ki riewlum trai ri trai muluk ha kano kano ka rukom ruh” ong ka kyrwoh.
Ka AAYWS ka kyrpad ïa ki seng A’Chik bad ki nongshong shnong ba kin ïatylli ha ka ban ïada ïa ka jinglong laitluid ka GHADC haba ban jur “Ka GHADC Ka dei jong ki riewlum trai ri trai muluk ka ri-lum Garo bad ka dei ban hap beit hapoh ka jingïalam jong ki riewlum”.
