Pyrshah jur ki trai trok ïa ka jingthmu ban pynlong election ban jied President JHTOA

Khliehriat naitung 12: Ki ba bun ki dkhot kiba don hapoh ka shatri jong ka Jaiñtia Hills Truck Owners Association na rilum Jaiñtia ki la pynpaw ïa ka jingpyrshah bad ka jingbym sngewhun jongki halor ka jingthmu ban pynlong ïa ka election ban jied President lane u nongialam ba ha khliehduh jong ka Jaiñtia Hills Truck Owners Association bad ka daw jong ka jingpyrshah ka dei namar ba ki nongïalam kiba mynta ki la ailad bad shah tang ïa ki katto katne ki trai trok ban thep kyrteng ban long kum ki kyrtong ha katei ka election ka ba la thmu ban pynlong ha ka 18 tarik mynta u bnai.
Katkum u kyrwoh la ong shuh shuh ruh ba katkum ki kyndon jong ka Election Committee ba la khlieh da u Chairman jong ka JHTOA, la shah ban thep kyrteng tang ïa kito ki trai trok kiba don kyrteng hapoh ka thup jong ka JHTOA katba la khanglad pat ïa kiba bun ki malik lane trai trok jong ka rilum Jaiñtia ban thep kyrteng ban long ki kyrtong.
Na ka liang u bah Balen Thubru u la pynpaw bad ong “Nga la bat kum u President jong ka JHTOA la 15 snem lynter bad ha ki snem ba la leit bad ngim ju khanglad ïa uno uno ruh uba dei u trai trok ban ïakhun ïa ka election President, hynrei kane ka kynhun mynta pat ka la pyrshang ban ïuhroit ïa ka hok jong ki trai trok” bad la ong ruh ba ha ka jingshisha, la thmu ban pynlong ïa kane ka election ha ka 11 tarik une u bnai hynrei namar ka jingpyrshah jong kiba bun la pynpep bad kynriah noh sha ka 18 tarik.
“Ka ba sngew phylla shuh shuh ka long halor ka jingshah kyntait u ma Balen Thubru ban long u kyrtong ban ïakhun ïa kane ka election bad hadien kane ka jingshah kyntait na ka liang u ma Thubru lem bad ki spah ngut ki trai trok ki la dawa ba dei ban ailad ïa baroh ki trai trok kiba kwah ban ïakhun ïa katei ka election ym ban shu ailad tang ïa ki katto katne ngut” ong u kyrwoh.
La pynkynmaw ruh ba kane ka Election ban ïa jied thymmai ïa u nongialam ka JHTOA ka long hadien ka jingshah rai pynrem u ma Nidamon Chullet ha ka iïng bishar bad ka jingrai set along ïa u shi jingim, kumta ka la dei ka por ban jied noh da uwei u nongialam u ban long kum u Presidents jong ka JHTOA.