Pyrshah jur ki trai trok ïa ka jingkhot pynthymmai kot kali ba tang 3 sngi ka JHTOA

Jowai, Naiwieng 19: Ki trai trok napoh ka Ri-Lum Jaiñtia hapoh ka jingïalam u ma Balen Thubru bad kiwei de mynta ka sngi Balang kila lum ïaka jingïalang ban pyrshah jur ïaka jingkhot pynthymmai (Renewal) ka Jaiñtia Hills Truck Owner Association (JHTOA) ïa ki kot kali da kaba buh por tang 3 sngi bad kane ka buh jingeh ïa kiba bun ba lang ban pyndep.
Shuh shuh u ma Balen Thubru kum uwei na ki trai trok ula ong hadien bala ïoh ïaka shithi ban pynthymmai ïa ki kot kali, kala pynkyndit ïa kiba bun ki trai trok hapoh ka Ri-Lum Jaiñtia kiba don hapoh ka lama jong ka JHTOA namar ka jingshim rai khlem da kynjoh ktien shwa ïa ki trai trok ne khot pynlong shwa ïa ka General Meeting.
Ha ka juh ka por kila dawa ban pynsangeh shwa ïa kane ka Renewal ïa ki kot kali bad dei ban pynjlan haduh shibnai, halor kane kitei ki nongñiah trok kiba phah ruh da ka jingthoh sha ka JHTOA bad kumjuh sha ki bor Dictrict.
Kum ki trai trok kila rai da kawei ka sur ban khot pynlong ïaka General Meeting hapoh jong u bnai Nohprah mynta u snem bad lada ka ka JHTOA kam lah ban leh ïa kane, kim ban se ban shim da kawei pat ki lynti ban pyrshah jur ïa katei ka jingshim rai tang ki katto katne ngut ki dkhot ka JHTOA, la ong u ma Thubru.
Katba u ma Pynshngaiñ Papang u ong kane ka jingbuh por ka JHTOA ban renew kot tang lai sngi bad kam long kaba kylliud. Kumta kum ki trai trok ki pyrshah jur ïa kane bad lada long katba lah dei ban buh por kumba 30 sngi eiei, ula ong ruh kino kino ki rai dei ban shim beit hapoh ka General Meeting.