Shillong, Lber 23 : Ki seng bhalang na ri lum Garo khamtam ka ADE ki la pynpaw ka jingpyrshah jur halor ka jingaiti jongka Meghalaya ïa kiba bun ki shnong sha ka Assam ha kane ka jingpynkhreh ïa pynbeit pud pynbeit sam.
“ Ngi la ïoh jingtip ba kiba bun ki shnong kiba hap baroh shi katta ha Meghalaya mynta kin leit noh sha ka Assam bad ïa kane la leh da ki bor sorkar khlem da twad bad ïamir jingmut bad ki nong shong shnong ha kitei ki thaiñ khappud” ong ka ADE.
Kine ki shnong ki long kum ka Malchapra bad Salbari kiba hap baroh shi katta ha ka Nonglang Sirdarship, West Khasi HIlls. Kine ki dei ki shnong kiba hap baroh shi katta hapoh Meghlayala. “ Ngi ïaroh ïa ka jingpyrshang jong ki ar jylla ban pynbeit ïa u pud u sam hynrei ngim lah ban pdiang ban shu rai sop sop ne aiti sop sop ïa ki shnong ki thaw sha ka Assam” ong ka ADE.
Ka sorkar Meghalaya ka la dei shwa ban ïakren bad pynsngewthuh ïa ki trai shnong shwa ba kan shim ïa kano kano ka rai ym ban leh narieh narieh namar barobor ki trai shnong ki dei kiba tip bha ki don ne ki hap ha kano ka jylla baroh shi katta. Kum ka seng kaba kit ïa ka khia ka shon ki paidbah kan ïeng tylli bad ki paidbah ban pyrshah ïa kane ka jingaiti sop sop ïa ki shnong sha ka Assam.
Ki trai shnong ki dei ki nong Meghalaya namar ka EPIC jongki ruh ka dei na Meghalaya, ka bor ding ruh ka ai ka MeECL, ka skul ruh dei kaba ithuh da ka MBOSE kumta kumno ka sorkar kan shu aiti ïa kine ki shnong sha ka Assam.
Ka Seng ka kyrmen ba ki ar sorkar naduh ka sorkar Meghalaya bad sorkar Assam kin ïa pynbeit ïa u pud u sam da kaba pynhun ïa ki nongshong shnong ha ki bynta khappud. Ka seng ka kyrmen ba ïa ka MoU ban ïasoi da ki ar jylla dei ban pynmih paidbah bad hadien kane dei ban ïamir jingmut bad ki paid khappud la ki hun ne em kat kum ka MoU.
Ka seng ka dawa ruh na ka sorkar ba ka dei ban ym aiti ïa kine ki shnong sha ka Assam hynrei ban pynneh beit ïa ki hapoh u pud u sam ka jylla Meghalaya, pynkut ka kyrwoh jongka ADE na u Dalseng Bira Ch Momin President.
