Nongstoiñ, Nailar 08: Saw tylli ki Shnong ka thaiñ Nongstoiñ West Khasi Hills, ki la pynpaw ïa ka jingpyrshah kaba jur ïa ka jingthmu ka tnad Excise, ban ai jingbit ha ka ban buh ïa ka bonded warehouse lane ka kudam buh kyiad ha ka shnong Domsaw.
Kine ki saw shnong ki kynthup ïa ka Nongjylliej, Tynrongwahladew, Sohlait bad Lawse. Ki nongshong shnong jong kine ki saw tylli ki Shnong, ha ka step sngi thohdieng ki la ïa mih paidbah ban ap ïa ka jingwan jong u Superintendent ka tnad Excise ka West Khasi Hills ha shnong Dawsaw, u ba thmu ban wan pynshai paidbah halor kane ka bonded warehouse.
Ka jingwan u Superintendent ka dei kaba la pynbeit da ka shnong Domsaw ba un wan pynshai, hadien ka jingai ïa ka No Objection Certificate ne NOC ban buh ïa ka bonded warehouse hapoh ka shnong. La pynbeit ba kane ka jingwan une u Ophisar kan long ha ka por 8 baje mynstep.
Mar ïa ïoh jingtip, ki paidbah ki saw shnong ki la ïa mih naduh ka por 7 baje mynstep ban ap ïa une u Ophisar, hynrei la ong ba kat haduh ka por 11 baje ruh, na ka liang ki bor ka Tnad Excise ki khlem wan mih satia.
Namar ka jingbym wan shuh une u Ophisar, ki Nongïalam Shnong jong kine ki saw shnong ba kynthup ïa u Bah Medral Kharbani, Rangbah Shnong ka Nongjyllieh, Bah Smowell Syiem, Rangbah Shnong ka Tynrongwahladew, Bah Arnes Thyrniang, Rangbah Shnong ka Sohlait bad ka President ka Seng Longkmie ka Nongstoiñ Area, ki la pynlong noh da ka jingïalang paidbah ban pynshai ïa ki nongrim halor kane ka jingpyrshah ïa ka jingwanrah ïa ka bonded warehouse ha ka thaiñ.
Ha kane ka jingïalang, ki Nongïalam Shnong ki la rai ruh ban thaw noh da ka Synjuk ki Nongsynshar Shnong, ban pyrshah ïa kane ka jingthmu bad ban leit ai jingthoh sha u Deputy Commissioner ka West Khasi Hills ba un pynsangeh noh ïa ka jingai jingbit.
