Pyrshah jur ki nongshong shnong ka Umkyrpong ïa ka jingai NOC u Waheh Shnong sha ka company Star Cement

Khliehriat, Iaiong 7: Ki paidbah nongshong shnong jong ka Umkyrpong, East Jaiñtia Hills District ha ka jingialang ba ki la pynlong mynta ka sngi ki la pynpaw ka jingsngew bitar bad pyrshah jur ïa ka jingleh u Waheh Shnong ka Umkyrpong, u bah Mithol Lamurong uba la ai ïa ka syrnot NOC ïa ka company Star Cement ban shna ïa ka karkhana hapoh shnong, ki nongshong shnong ki la kynnoh ba kane ka dei ka jingleh sop sop u Waheh Shnong khlem ka jingtip ka paidbah nongshong shnong.
Ka shnong Umkyrpong ka dei ka shnong kaba don haduh 500 tam ki nongshong shnong bad don kumba 197 tylli ki long ïing, ka hap nhapoh ka elaka Sumer, ka sei ka jaka bad ka thaiñ kaba don bun bha u mawshun bad kane ka shnong ka hap ha ka Mooriap Border Outpost.
Haba kren sha ki pathai khubor u bah Rowin Langstang u la ong bad kynnoh ba “ha kaba ïadei bad ka jingleh u rangbah shnong, u la iaid lynti da kaba sop sop ha kaba ai NOC ïa ka Star Cement, u la ïa soi ïa kane ka NOC ruh myn ha kine ki khyndiat sngi ba la leit kata ha ka por 8 baje mynmiet, katkum ka rukom treikam ym ju dei ban iathoh ïatar ha ka por mynmiet, dei ban iathoh ha ka por mynsngi haba shai, ngi na ka liang ki paidbah ngi pyrshah jur ïa kane ka jingleh u rangbah shnong, wat ki nongshong shnong ruh ki pyrshah ïa kane, nga kwah ruh ban pynsgew ïa kane wat hakhmat u MDC ka thaiñ, u bah Krison Langstang bad hakhmat u CEM, ka JHADC, u bah Thombor Shiwat ba ki dei ban shim ïa kane ka kam ban pynduh pyndam noh ïa ka jinglong rangbah shnong, ka JHADC ka dei ban shim kam noh mardor ym dei shuh ban pynslem khnang ban ioh ban jied rangbah shnong noh da uwei lada pynslem mano ban bahkhlieh, ngi dawa ïa u doloi ruh ba un rah ïa kane ka khubor sha ka distruct concil khnang ba ngin im ha ka suk ka saiñ”.
U bah Arki Lamare, ruh u la pyrshah ïa ka jing ai NOC u rangbah shnong sha ka Star Cement bad ong ba “ngi la dep pynlong jingialang bun sien halor kane bad ha kine ki jingialang ngi la ïa mih ryntih bad pynsngew ruh ban ym dei ban ai NOC ïa ka Star Cement namar ngi shane ngi dang im da ka rep ka riang, lada ai NOC ïa ka Star Cement kan pynsiew ïa ka lyer kaba khuid, te na duh ka sngi ba ngi la pynlong jingialang bad haduh kane ka sngi ngi pyrshah ïa kane ka jingai NOC ban shna karkhana hapoh u pud u sam bad ngi pyrshah ruh ïa ka Star Cement ban shna karkhana hapoh u pud u sam ka shnong”.
Kumjuh ruh na ka liang ki longkmie ba na shnong Umkyrpong, ka kong Soi Lamare ka la ong bad pynpaw ka jingsngew khia ïa ka jingleh u Waheh Shnong, bad ong ba kum ka longkmie ka sngewdiaw ban iohi ïa kaba kum kane bad ong ba baroh ki nongshong shnong ki dei kiba im da ka rep ka riang, ka pynpaw ka jingpyrshah ruh ïa ka company Star Cement kaba thmu ban shna karkhana hapoh shnong, kane ka longkmie ki la kynnoh ruh ïa ka jingai NOC u Waheh Shnong bad ong ba kane ka jingai NOC ka dei kaba la shu ai klumar khlem da tip lang ki paidbah nongshong shnong bad kane ka jingleh u waheh shnong ka pynklumar ïa ki paidbah bad iathuh ruh ba na ka liang u Waheh Shnong ki la ïa don tang 10-15 ngut kiba ïadei shi ïing shi sem kiba la ïa leit sha Khliehriat bad ia soi ïa ka NOC bad ki la ïa soi ïa kane ka NOC ruh dei ha ka por kumba 8 baje mynmiet ka la bynrap shuh shuh da kaba ong “ngin nym hun ïa kane khlem da hun lang ki paidbah nongshong shnong, nga pyrshah ia kane namar naduh ka 5 tarik u bnai kyllalyngkot nga la khanglad ïa u waheh shnong ba um dei ban soi ïa kane ka NOC namar kane ka dei ka iap ka im jong ka pateng ka ban wan”.
Kumjuh ruh na ka liang ka kong Pli Sumer, ka la ong “ngim kwah ïa ka lyer kaba jakhlia ngi kwah ban im kumne kumba ngi im da ka lyer kaba khuid, ngim kwah ban wan ka Star Cement bad na ka liang jong ngi kum ki nongsong shnong ruh ngi khlem die ïa ki jaka sha ka company Star Cement hynrei ngi die ïa ki jaka sha u briew shimet”
Ki nongshong shnong ki la iathuh ruh ba ki la dei ïa ki jaka jong ki kiba heh da ki hajar akar bad ïa ki jaka ki la die sha uwei u briew shimet bad ong ba ki khlem die satia ïa ki jaka sha ka company Star Cement.