Pyrshah jur ka VDP Elaka Sutnga ban wan bret ïa ki ñiut na Jowai

0

Khliehriat Iaiong 20: Ka Joint Village Defence Party Elaka Sutnga, ka pynbna paidbah kum ka jingpyntip ba ka pyrshah jur ïa ka jingthmu ban wan bret ïa ki ñiut na Jowai sha elaka Sutnga, ka VDP kan nym shah bad kan nym ailad da lei lei ruh ban wanrah ïa ki ñiut ki jakhlia jong ka Jowai Municipal Board kiba la shu satah ha sor Jowai.
Kane ka jingpyrshah jong ka Joint VDP jong ka elaka Sutnga, ka dei hadien ba u bah Damewanhi Rymbai, mynta ka sngi u la soi ïa ka soskular jingia mynjur bad ka Jowai Municipal Board ha kaba u la shah ban wan bret ïa ki ñiut ha ka thliew dewiong jong u kaba don ha shnong Moolamylliang kaba hap hapoh ka elaka Stnga “Lada u kwah ban ai jaka bret ñiut ïa kata ka Jowai Municipal Board, u la dei ban ai ha shnong jong u hi ha Wapung, ym ban wanrah shane sha elaka Sutnga” ong u kyrwoh na u Secretary Joint VDP Elaka Sutnga, u bah Pynbait Sutnga.
Ha kajuh ka por, ka VDP Elaka Sutnga, ka maham jur ruh ïa baroh ba ym bit ban wan pynjakhlia ïa ka jaka kaba dang hap hapoh u pud u sam jong ka elaka khamtam ban wanrah ïa kita ki ñiut kiba na Jowai namar ka elaka Sutnga hi kam dei ka jaka bret ñiut jongno re jongno.
Ka Joint VDP Elaka Sutnga ka maham ruh ba Lada lap ïa kino kino ki trok ne ki kali kiba kit ñiut kiba mut ban wan Bret sha Elaka Sutnga, ki dkhot VDP kin Kem bad kin bat beit ïa ki nong ñiah trok kit ñiut bad pynshitom ïa ki..

Leave A Reply

Your email address will not be published.