Nongpoh, Ïaiong 14: Ka seng Ri Bhoi Youth Welfare Organisation (RBYWO) ka la pynbna shai ba ka pyrshah jur ïa ka jingthmu jong ka sorkar ban thied jaka na ka bynta ki shipai Central Industrial Security Force (CISF) ha ka thaiñ Umroi, Ri-Bhoi District.
Katkum ka kyrwoh na u Working President ka seng, u Bah Apbor Nongrum, u la pynpaw ba ka RBYWO ka ïeng pyrshah halor kane ka jingpynmih da ka ophis u Deputy Commissioner Ri Bhoi District ha ka 8 tarik u Ïaiong 2025, kaba dei ka Public Notice, Expression of Interest ban die jaka na ka bynta ki jaka sah jong ki shipai CISF, ha kaba ka ophis jong u Assistant Commandant/CASO, CISF, Shillong Airport, ryngkat ka jingsngewthuh jingmut bad ka sorkar jylla ki don ka jingthmu ban shim jaka sha bar ka Airport Umroi na ka bynta ban shna jaka sah na ka bynta ki shipai CISF.
Katkum ka kyrwoh jong ka seng, la ong ba mynta ki shipai ki shong ha ka jaka hapoh Umroi Airport, hynrei mynta ki la wad jaka kaba jngai hapoh 5 haduh 10-kilometre na Umroi Airport, bad naka liang ka RBYWO ka la pynpaw ba kane ka jingthmu ka lah ban buh jingeh ïa ki paidbah kumba la jia ha Nongsder ha ki snem bala leit naka jingdon ki shipai.
U Bah Nongrum u la ong ruh ba ka sorkar bad ki shipai bunsien ki kular ïaka bneng bd ka khyndew ïaki paidbah, hynrei ha ka jingshisha ki paidbah ki shem jingeh hadien. Kumta ka seng ka kyntu jur ïa ki trai jaka ba kin ym thep kyrteng ban die jaka sha ki shipai bad ban ym buh ïaka pisa ha khmat.
Ka RBYWO ka kyntu ruh ïa ki Dorbar Shnong bad ki Syiem Raid ba kin ym ai NOC, sha ki briew kiba pyrshang ban die jaka sha ki shipai CISF lyngba ka ophis u Deputy Commissioner.
Shuh shuh, ka seng ka kyntu ruh ïa ka sorkar jylla ba ka dei ban thaw lad ban ai kam ïa ki samla ka jylla kiba la pyndep ïa ka training ha ki registered security institutes, khnang ba kin ioh kam ha Shillong Airport, ban long ka lad ioh kam bad ym ban ai jaka sha ki shipai CISF.
