Pyrshah jur ka KSU ba ai sngewbha ka Meghalaya da ka jingkieng bad ka Wah Malidor sha ka Assam

Khliehriat Iaïong 26: Ka KSU Narpuh circle hadien ba ka la ïohi ïa ka jingïasoi soskular (MOU) ba la ïa soi hapdeng ka sorkar Assam bad sorkar Meghalaya hadien ka jingïabeit lang jong ka Regional Committee ban pynbeit ïa u pud u sam (Border Issue) hapdeng kitei ki ar jylla, bad hadien ba ka la khmih halor ka jingïapynbeit pud ka ba dei hapoh East Jaiñtia Hills District ha Malidor na ka liang ka seng ka pyrshah jur namar ka sorkar Meghalaya ka la ai sngewbha da ka jingkieng bad ka Wah Malidor ba kin hap shapoh Assam.
Dang ha kine ki khydiat taïew ba la dep ka seng tang shu ïohi bad ïoh jingtip halor katei ka jingïasoi MOU hapdeng kitei ki ar jylla, ka seng hapoh ka jingïalam u Phanuel Tongper Vice President ka leit hiar sha Ratachera ban ïakynduh ia ki nongïalam shnong. Ha kane ka jingïakynduh bad u Rangbah shnong Ratachera u bah D. Pohshna MDC barim ka Thaiñ Narpuh u la ïathuh ba shwa ka jingïapynbeit pud bad soi MOU hapdeng ki ar jylla, ka dorbar shnong Ratachera ka la dep phah shithi sha ka Regional Committe ban dawa na ka sorkar ba u pud ban ïa pynbeit kan long hapdeng ka wah Malidor bad hamar pdeng ka jingkieng ka ba mut ka sorkar Assam bad Meghalaya kin long trai ïa kitei ki jaka ka ban long Natural Boundary ban pynneh pynsah ïa ka wah malidor bad ïa ki jingdon jingem baroh bad ki mar poh khyndew.
Hynrei khlem poi pyrkhat ka sorkar jylla ka ai sngewbha ïa ka jingkieng bad ha shilynter ka wah ban long trai da ka Assam. Ha ka jingïasoi MOU, la ïohi ba ka sorkar Assam ka kular ban ym shah ban pynlong jaka khaïi ne commercial ha kato ka jaka kum ka jingkhlong maw khlong shyiap.
Ka Seng ka la ong ba na ka liang ka shnong Ratachera ka la pynpaw ka jingkyndit ban ïohi ïa katei ka jingïasoi khlem da sngap ïa katei ka shithi ba la phah. Ka jingkam jong ka sorkar ban kynthup ïa ka jingkieng bad ha baroh shilynter ka wah da kaba pynthikna ruh ia ka sorkar jylla ban ym pynlong commercial area, ka dei tang ka jingpynbieit kai.
Nalor kata la sakhi da baroh ba wat hapdeng ka jingïajia pud haba ym pat lah ban ïa pynbeit ïa u pud u sam, u maw hangto la lut phar, hato ynda la ïoh kam trai lei ïa kito ki jaka te la sngewthuh hi kaei ban jia.
Ka Seng ka la ong ruh ba ka sorkar Meghslaya kam don hok shuh ban tuklar namar lah dep die sha Assam, kane khlem pep kan buh jingma ïa ka jylla jong ngi. Ha ka jingïapynbeit pud, la ïohi ba ka shnong Ratachera, Malidor bad Ampyrdi ki hap shapoh Meghalaya, ithamula shisha haba la tip ba kitei ki shnong ki dei lypa ki jong ka Meghalaya, ym ju don ka jingïaknieh ne ïa khajia pud hangtei.
Ha ka jingïapynbeit pud na sha liang mihngi pat ka long lyngba u pillar 139 ba la ïa hun baroh ar liang mamla ba baroh ki bri tympew, bri kwai bad kiwei kiwei ki jingthung jong ki trai shnong ki ïoh lut baroh. Haba ïa kren, u rangbah shnong u la ong ba ka shnong Ratachera kam hun satia ïa kaei kaba ka sorkar ka leh lyndet ïa ka shithi ba la phah bad dawa ban pynbeit ïa ka warding ba u pud u dei ban long haodeng wah (um). Ha ka jingïadei pat bad ka Borial Wildlife Sanctuary, kane kan neh kumjuh hapoh ka jingpeit ka shnong bad ka sorkar jylla.