Pyrshah jur ka HYC-EJH ïa ka ‘Public Hearing’ ban wanrah ïa ka M/S MeghaTop Cement Pvt. Ltd ha Wahiajer EJHD

Khliehriat risaw 14: Ka Seng Hynñiewtrep Youths’ Council (HYC) East Jaiñtia Hills District (EJHD) ka pynpaw ka jingpyrshah kaba jur ïa ka jingthmu ban pynlong ïa ka jingpynsngew paidbah ne ‘Public Hearing’ da ka Meghalaya State Pollution Control Board (MSPCB) ha ka 18 tarik u Risaw 2024 ha kaba ïadei bad bad ka jingthmu ban wanrah ne seng ïa ka M/S MeghaTop Cement Pvt. Ltd ha ka shnongWahiajer, East Jaiñtia Hills District.
Ka jingpyrshah ka jong ngi ka mih na ka jingshisha ba ka jingbishar ka dang ïaid wat hapdeng ki jingpyrshah kiba shai bad pyrshah jur na ki paidbah nongshong shnong ka Wahiajer, ki paidbah ka Elaka Narpuh bad ka District hi baroh kawei,” ong u kyrwoh lyngba u Bah Dismit Sumer, Publicity Secretary ka Seng.
Ka Seng ka la ong ruh dei ban sngap ïa ka sur jong u paidbah bad ym dei ban pyndem da kano kano ka bor la ka long ha ka shnong, ka Elaka, ne ka district, la ong ruh ba ki paidbah ki don ka hok ban shah kynthup ha ki rai kiba ktah beit ïa ka jingim jong ki bad ym dei ban iehnoh ïa ki jingeh jong ki.
“Kumta ngi kyntu jur ba ba dei ban pynsangeh noh ïa katei ka jingpynsngew paidbah namar ka dei ka jingangnud jong ki paidbah trai shnong bad ki paidbah ka Elaka hi baroh kawei.Ngi pyrshah ïa ka jingbuh ne ban wanrah ïa kane ka karkhana namar watla ki don bun ki karkhana ha ka district jong ngi, hynrei ka jingkyrduh kam kyrduh jam ka dang ïai long ka mat kaba kongsan ïa ki nongshong shnong jong ka thaiñ hi baroh kawei,” bynrap ka Seng.
Ka swng ka la ong ruh ba kine ki karkhana ki kham sngewtynnad ban wanrah ïa ki nongtrei na shabar jong ka thaiñ, ki ai jingmyntoi tang khyndiat eh ïa ki nongshong shnong. Nalor ka jingeh ha ka liang ka ioh ka kot, ka jingktah ïa ka mariang lyngba kine ki karkhana ka la long kaba jur haduh katta katta, ha kaba ka jingjaboh ka lyer bad ka jingmih pum pum dewbilat ka la wanrah ïa ki jingeh ba khraw ha ka koit ka khiah jong ki nongshong shnong.
Kumta ka Seng ka la ong ba lada ailad ïa kane ka karkhana thymmai ba kan ïaid shakhmat, kan shakri bad pynmyntoi tang ïa ki briew kiba na bar katba kan nang pynsniew shuh shuh ïa ka mariang bad ïa ka koit ka khiah jong ki trai shnong bad ki nongshong shnong jong ka Elaka hi baroh kawei.
Halor kine ki jingsngewkhia, ka Seng HYC ka kyntu jur ïa ka MSPCB ba kan weng noh ïa ka jingthmu ban pynlong ïa kane ka jingpynshai paidbah bad ban shimkhia ïa ka jingshah ktah jong ka mariang bad ban wanrah ïa ka jingbha jingmiat jong ki nongshong shnong.
Shuh shuh la ong ruh ba dei ban buh hakhmat eh ïa ka sur jong ki paidbah kiba dei ki trai shnong jong ka thaiñ bad ka Elaka ban pynthikna ba ka roi ka par ka ym wan ha ka jingduh nong ïa ka mariang bad ka koit ka khiah jong ki nongshong shnong.
Halor ka jingpyrshah ka Hynñiewtrep Youth Council East Jaiñtia Hills District mynta ka sngi ka la leit ban buh da ka jingthoh ha u Deputy Commissioner ka East Jaiñtia Hills District.