Khliehriat Lber 28: Ka Hynñiewtrep Youths’ Council (HYC), Wapung Unit ka pynpaw ka jingpyrshah jur ïa ka jingwan theh ñiut ka Jowai Municipal Board sha shnong Wapung Shnong, East Jaiñtia Hills District kaba khlem da ioh jingbit na ki bor pyniaid Shnong.
Na ka liang ka seng ka kyntu ruh ïa ki bor pyniaid district jong ka East Jaiñtia Hills District ba kin tukkar lem halor kane ban leh eiei halor kane k jingwan theh ñiut pathar ka Jowai mMunicipal Board, namar lada ailad kumne khlem pep kan sa ktah ïa ka koit ka khiah jong ki pidbah, kan ktah ïa ki um bam um dih bad kumjuh ruh ïa ki sawdong sawkun jong ka mariang kiba don hajan ka jaka ba theh ñiut, khamtam ha ka por lyiur ba slap ki ñiut kin tuid pathar bad pynjakhkia.
Ka seng ka kyntu jur ïa ka Jowai Municipal Board ba kan wan kit noh mardor ïa ki ñiut ba la theh ha katei ka jaka ha Wapung Shnong, East Jaiñtia Hills District.
Ha kajuh ka por ka seng ka pynrem jur ïa u Myntri ba dei peit ïa ka tnat Municipal kaba paw shai ïaka jingtlot treikam ka bym lah ban pynioh ïa ka jaka kaba paka ban theh ne bret ïa ki ñiut.
Ka Seng ka maham ruh ba lada jia ba Ka Jowai Municipal Board kam shim Khia ïa kane ka jing kyrpad bad jingkyntu, Ka Seng kan shong pyrkhat bad kan sa leh ïa kaba donkam.
