Nongstoiñ, Jylliew 13: Ka Hynñiewtrep Youths Council HYC West Khasi Hills District mynta ka sngi hapoh ka jingïalam u samla Lumlang Kharsyiemlieh President bad Samla Losbingnel Lyngkhoi Asst GS, ka la leit ai jingthoh bad ïakynduh ïa I Post Master Post Office Nongstoiñ West Khasi Hills District, ban pyrshah ïa ka jingwan trei ne sam shithi ne Gramin Dak Sewak (GDS) kiba dei ki 6 ngut ki bar jylla, kata ha Shnong Byrki, Jaidoh, Mawlieh, Nongtynñiaw, Nongkasen bad Shyrkon.
Hadien ba la ka ïakynduh, ka Post Master ka la ïathuh bba 4 ngut ki bar jylla ki la ïoh NOC na Shnong Ladweitang, iwei na Jaidoh, iwei na Shyrkon. Na ka lïang ka seng ka la maham jur ïa ki bar jylla ba ki lah ban ïoh NOC na ka Shnong. Hynrei ka seng kam ailad ban wan trei hapoh West. Ka seng ka dawa ban dei ban thung da ki trai Shnong.
Na ka liang katei ka Office ka ong namar kine la thung da kaba peit ïa ki Percentage ba heh, bad lada kim ai NoC ki Shnong kim ïoh ban trei. Ka Office ka la kular ban shimkhia bad ban phah ïa kane ka jingdawa ka Seng ha Shillong.
