Shillong, Naitung 28: Ka Hynñiewtrep National Youth Front (HNYF) Mawryngkneng Circle ka la pynpaw ka jingpyrshah kaba jur halor ka rai jong ka Dorbar Shnong Pommura ban ai ïa ka no objection certificate (NOC) na ka bynta ban buh ïa kumba 4 ne 5 tylli ki dukan wine store hapoh kane ka shnong.
Ha ka shithi ba la aiti sha u Myntri ka tnat Excise u Bah Kyrmen Shylla ha ka sngi Nyngkong, u Working President ka HNYF-MC u Bah Robert Sohtun u la ong, “Ngi pynpaw ka jingpyrshah kaba jur halor ka rai ki dorbar shnong ban ai NOC na ka bynta ban buh ïa kumba 4 ne haduh 5 tylli ki dukan wine store. Kumta ngi kyrpad ïa ka jingtuklar jong phi ban pynsangeh ïa kane ka jingthmu.”
Katkum ka jingong jong u, kane ka jingpyrshah ka la long katkum ka jingïohi ba haba don tang kawei ka wine store ka la wanrah ki jingjia takhuh kali bad ki jingpynkheiñ ïa ki aiñ bad kumjuh ruh ki jingmih ki aksiden kiba pynduh noh ïa ki mynsiem briew.
