Pyrshah jur ka HNPF ïaka jingpynhap jubor ïaka ‘Elaka Labang-Nongphyllut bad Pangam Raliang’ shapoh Assam

Jowai Nailur 06: Ka Hynñiewtrep National People Federation (HNPF) West Jaiñtia Hills lyngba u President ma Newoneborn Suchiang kala pynpaw ka jingpynshar jur ïa ka jingthmu ban pynhap jubor ïa ka thaiñ Labang-Nongphyllut bad Pangam Raliang Block-I shapoh ka jylla Assam.
Utei u President ula ïathuh ba ka Elaka Labang-Nongphyllut bad Pangam Raliang ka dang dei ka bynta bad ka hok jong ka Ri Jaiñtia naduh ki por hyndai hynthai bad ki Nongshong shnong hapoh kane ka Elaka ki dei ki Nongjaiñtia (Pnar) naduh ka riam ka beit ka ktien ka thylliej, ka kur ka jait bad kiwei de.
Shuh shuh utei u President ula ong ba kane ka jingthmu pynbeit pud hapdeng ka Jylla Meghalaya bad ka Assam haka Phase ba II, “katba long ba katei ka jaka ka dei ban wanphai biang shapoh u pud u sam ka jylla Meghlaya wat tang shi inshi jong ka jaka kam dei ban leit sha ka Assam”.
La pynsngew ruh ba ki ar District United Khasi & Jaiñtia Hills bad Mikir Hills kaba la long ha ka snem 1958 ba ïa ka thaiñ Elaka Labang-Nongphyllut bad Pangam Raliang la pynïasoh jubor da ka Sorkar Assam ha ka jingai District ïa ka Mikir bad North Cachar Hills ha ka snem 1951.
Ula ong ruh wat haka por ba ïakhun MLA u Hamdon Lamare bam kwai ha dwar U Blei na ka 3 Raliang Constituency jong ka Elaka Raliang Dolloiship, kala don ka sur jingrwai Election jong u ba ka kyrteng jong katei ka jaka ruh ka paw ba ka dei ka jaka jong ki khun ka Ri Pnar.
Na ka liang ka seng ka ai ka jingkyrshah ba pura ïa ka kynhun na katei ka thaiñ Block-I kaba la leit ban ïa kynduh ïa u Symbud Myntri Rangbah hynnin ka sngi ban pynsngew ha u ba katei ka jaka ka dei ban wanphai biang shapoh ka jylla Meghalaya.