Pyrshah jur ka HITO ïa ka jingrai ka sorkar ban ai jaka tei Taj Resort ha Dam Umïam

Shillong, Iaiong 9: Ka Hynniewtrep Integrated Territorial Organisation (HITO) ka pynpaw ka jingpyrshah jur ïa ka rai jong ka Sorkar Meghalaya ban ai wai ïa ka jaka kaba heh 66 acre ha ka Dam Umiam sha ka Indian Hotels Company Limited (IHCL) ban tei 5-star Taj Resort & Spa.
“Ngi sngewkhia ba kane ka Project ka lah ban ktah ïa ka ïoh ka kot bad ïa ka kamai kajih ki trai shnong bad ïa ka imlang sahlang” ong ka HITO ha ka shithi ba la phah sha u Myntri Rangbah ka Jylla Conrad K Sangma.
“Ka jingdon lypa ki Hotel ba heh ka la ktah bha ïa ki Hotel bad Home Stay jong ki trai shnong, kaba la wanrah ruh ka jinghiar ka kamai kajih jong ki”.
Ka HITO ka la buh jingkylli ïa ka jingmyntoi jong kane ka projek, da kaba kdew ïa ka jingsngewkhia halor ka jingktah ïa ka mariang, ka jingïoh lum khajna, bad ka lad ïoh kam ki samla trai shnong.
“Ngi kyntu ïa ka Sorkar ban pyrkhat biang halor kane ka projek bad ban pynsangeh noh ban shim ïa kino kino ki sienjam ban tei 5 Star Hotel hajan ka Dam Umiam,” ong ka shithi.
Ka HITO ka la maham ba lada ka Sorkar kam sngap ïa ki jingdawa, ka Seng ka long kaba la pynkhreh ban lum paidbah ban ban ïakhih naka bynta ban ïada ïa ki jingmyntoi jong ka imlang sahlang bad ban ïada ïa ka mei mariang jong ka Meghalaya.