Shillong, Jymmang : Ka Excutive Committee (EC) jong ka Dorbar Shnong Mawlai Nongkwar hynnin ka sngi ka la pynpaw ka jingpyrshah jur halor ka jingthung rangbah shnong jubor ïa u bah Moonstar Rumnong ha ka dorbar ba la pynlong ha Nongkwar Secondary School, Mawlai Nongkwar ha ka sngi Saitjaiñ ba la lah (28.05. 2022).
Haba kren sha ki nongthoh khubor hakhmat ka ophis jong ka Hima Mylliem ha Mawkhar, Shillong hashwa ban ïakynduh ïa u Acting Syiem ka Hima Mylliem, u Ainam Manik Syiem, u bah Wanseng Jyrwa u Deputy Rangbah Shnong bad kum u caretaker ba la thung da ka ophis u Acting Syiem u Paiem Ainam Manik Syiem u la kren shai ba ha kato ka dorbar kaba la pynlong ha ka 28.05.2022 ka long beit thik na ka bynta ban ai ïa ka report treikam jong u rangbah shnong barim u bah Rap Thangkhiew (bam kwai ha dwar u blei) bad ïa ka report halor ka jinglut jingsep, ym ban jied rangbah shnong thymmai.
U pynpaw ba ki la pyrta shnong lai sngi lynter thik tang ïa ka jingai report, ym ban ïa jied rangbah shnong.U Bah Wanseng u ïathuh ruh ba ka EC ka la dep thaw ruh ïa ka elekshon committee na ka bynta ban jied rangbah shnong thymmai, bad ha ka ba ïa dei bad kane ki la dep ai ruh ïa ka resolution sha u Paiem, uba la pdiang bad mynjur ïa ka jingpynlong ilekshon ha Mawlai Nongkwar.
Katkum u bah Wanseng u la pynpaw ruh, lada ki ïaid ha ka lynti kaba dei da kaba shu ïa thep vote ha ka elek shon kaban long, lada i bah Moon i jop baroh ki paidbah kin pdiang ïa i kum u rangbah shnong.U la pynpaw bad kaei kaba la jia ha ka sngi Saitjaiñ, kim lah ban pdiang satia ïa kum kato ka rukom jied rangbah shnong da ki katto katne ngut.
Haba batai bniah u Bah Wangseng u la pynpaw ba ka Executive Committee ka Dorbar Shnong kaba la shong pyrkhat kam ha ka 14/4/2022 bad 14/5/2022 ka la ïa kut ban pynlong noh da ka Dorbar Shnong paidbah ban pynsngew paidbah ïa ka report treikam (1-9-2018 haduh 14-5-2022) bad ïa ka Financial report kaba kynthup ïa ka jingpynlong ïa ka jingïajied (Election) Rangbah Shnong thymmai hadien ka jingkhlad noh u Rangbah Shnong barim.
Nalor kata ula ong ruh na ka bynta ban pynïaid beit ïa ka kam la phah jingtip ha u Acting Syiem katkum ka shithi No.DSMN/Rs/2022-2023/1tarik 25/4/2022 katkum ki jingïakut jong ka E.C bad la ïoh jingbit katkum ka shithi No. MS/V-130/89-06/585-87 dated 10th May 2022 jong ka office jong u Syiem ka Hima Mylliem.
Ban pynïaid ryntih ïa ka Dorbar bad ka EC u Acting Syiem u la aibor ïa lai ngut ki lam khmat nongkitkam Shnong ban long ki care taker, kiba kynthup ïa arngut ki deputy rangbah shnong u Bah Wanseng Jyrwa bad u bah Bleborne Rymbai bad ïa u bah Silvester Mawiong, uba long u Secretary Shnong, kat bym pat ïoh ïa u Rangbah Shnong ba pura. Te kumta la khot ban pynlong ïa ka Dorbar paidbah haka 28/05/2022 halor ki mat (Agenda) ba la rai ka E.C, bynrap u bah Jyrwa.
Shuh shuh u la ong ba la pynlong ïa ka jingpynjari ne pyrta shnong la lai sngi linter kata ha 25,26,27/05/2022 da kaba pyrta ïa ki paidbah nongshong shnong ban ïa poi ryntih ha kaba ïadei ka Dorbar ïa kaba yn sdang ha ka por 8 baje mynstep ha Mawlai Nongkwar Higher Secondary School.Ha kane ka sngi la pynïaid ïa ka Dorbar da u Bah Belborne Rymbai uba long u Deputy Rangbah Shnong uba dei ruh u care taker da ka jingpdiang burom ïa baroh kiba la ïa poi katba dang pynïaid la don ka jingpynthud da ki katto katne ngut ki paidbah bad ïa u Nongpynïaid ïa ka Dorbar. Hadien nangta la pyrta da kita hi ki kynhun bad tang ba dei ban jied da u Proterm Chairman ban pynïaid ïa ka Dorbar ym kum ba la rai da ka EC khnang ban lait na kino kino ki jingïa kulmar jingmut la pdiang ïa u Bah Moris Lyngdoh ban long u Proterm Chairman bad ka jingïalang ka lah ïaid beit, ha kaba la pynsngew ïa ka report treikam naduh 1/9/2018 haduh 14/05/2022 da u General Secretary ryngkat ka jingpule ïa ka rai ki E.C kaba 14/4/2022 bad 14/05/2022, ïathuh u bah Jyrwa.
U ong ruh ba la pynsngew ïa ka Financial Report da u Treasurer bad baroh ki paidbah ki la pdiang ïa ka report ryngkat bad ki katto katne ki jingai jingmut.U bah Jyrwa u la ong ruh, Hynrei ka la long pynban da khongpong ha kaba u Proterm Chairman um shym la burom bad u lah ïaid shakhmat bad pyrta ban jied noh ïa u Rangbah Shnong thymmai da ka jingïa rah kti (Voice Vote). Dei da kumta lah mih ka jingkulmar.
Shuh shuh u la pynpaw ba hapdeng jong katei la ïaid shakhmat da kito kiba pyrshah bad pyrta ba la jied ïa u Bah Moon Rumnong ban long u Rangbah Shnong. U la ong shuh shuh ba katei ka jingleh donbor da ki katto katne ngut ka lah pynbitar ïa kiba bun ki paidbah bad kaba long ruh pyrshah ïa ka jingaibor da u Paiem, kaba long ruh kaba pynkheiñ ïa ka Section 16(1) jong ka Act of Hima Mylliem 2007.
U Bah Wanseng u ba la kyrpad ïa u Paiem ba um dei ban pdiang ïa kane ka jingthung rangbah shnong jubor
u la ïathuh ruh ba hadien ba la dep ïakynduh ïa u, u Paiem u la pynpaw sha ki ba un bishar bniah ïa ki kot ki sla bad u pyntip ruh ba um don jingtip eiei ha ka ba ïa dei bad ka dorbar ba la pynlong ha ka 28.05.2022 bad um pdiang ruh ïa kum kane ka dorbar.
Ha kane ka jingïakynduh ka kynhun u Bah Wanseng ka la aiti ruh ïa ka shithi sha u Paiem bad lyngba kane ka shithi ki la pynpaw ïa ka jingpyrshah jur ïa ka jingjied rangbah shnong jubor bad ki la banjur ruh ka EC baroh kawei ka kwah hi da ka ilekshon, ym da kaba shu ïa rah kti.
Shuh shuh ha ba kren ha katei ka jingleit ïakynduh ïa u Paiem ka Hima Mylliem na ka liang u riew rangbah, ki longkmie bad samla ki la pynpaw ka jingpyrshah bad ba kin ym pdiang da leilei ïa katei ka rukom jied Rangbah Shnong.
