Shillong, Jylliew 22: U Chief Executive Member ka Khasi Hills Autonomous District Council (KHADC) u Bah Pynïaid Sing Syiem ula pyrshah jur ïa ki Bank kiba la plie ha kane ka sngi Palei kaba dei ka sngi shuti kum ka jingkynmaw burom ïa u Kpa ki Dak Thoh Khasi u Rev Thomas Jones.
“Nga pynpaw ïa ka jingsngewkhia halor ki khubor kiba ngi ïohi ba ki don katto katne tylli ki Bank kiba la plie ïa ki jingtreikam jongki mynta ka sngi, ka 22tarik u Jylliew kaba long ka sngi shuti ban kynmaw burom ïa u (L) Thomas Jones uba long u Kpa ka ktien Khasi bad uba wanrah ïa ki dak pule. Haba ïadei bad kane ka jingplie jong ki bank ban treikam ha kane ka sngi shuti jong une u riewkhraw na ka liang jongngi kum ka Council ngi sngew ban pynpaw ïa ka jingpyrshah jur bad shimkhia ïa kane ka kam ryngkat bad ka sorkar jylla ban pyntikna ba ha ki por ban wan ba kan ym jia shuh kumne.” u la ong ha ka kyrwoh.
