Pyrshah jur ban wan buh ïa ka Casino ha Ri Bhoi

Nongpoh, Nailar 14: Da ka jingsngewkhia halor ka jingma kaba ap na ka jingpur sted u Drok ha ka District bad ha ka jylla hi baroh kawei, ka Khasi Students’ Union, North Khasi Hills District Unit ka la pynpaw ba la donkam ba ka sorkar jylla kan buh kyrpang noh da ki ‘Recreation Centre’ na ka bynta ban saindur ne ban ai jinghikai ïa ki samla kiba la ngop bad shah kyrni ha u Drok.
Haba ïa kren bad u Nongthoh Khubor ka District, u Samla Ferdynald Kharkamni, u la pynpaw ka jingsngewkhia halor ka jingma kaba ap ïa ki khun samla na ka jingpur sted u drok ba bun ki samla ba lui lui ki la shah pynngop bad kyrni ha une u drok uba la pynjot ïa bun ki khun samla ka District bad ka jylla.
“Ka KSU ka sngewkmen ruh lada bun ki khun samla kin wan ban pynïasoh sha ka seng KSU, ha kaba ka jingthmu ba ki wan ban pynïasoh sha ka seng KSU kam dei satia tang ban long kita ki dkhot ba pura ka seng, hynrei shi bynta ruh ban saindur ïa ki khun samla ba kin tip ban ïaid ha ka lynti haba ki la shim ïa kata ka kyrdan kum ki shipai ka Jaidbynriew ban tynrong ïa ka eh ka shon jong ka Jaidbynriew” ong u Samla Ferdynald Kharkamni, President ka KSU North Khasi Hills District Unit, bad bynrap ruh kum ka seng ka dap shisha da ka mynsiem jong ka jingsngewkhia ha kine ki sngi halor ki khubor ba bun ki khun samla ki la ngop ha u drok uba long u pynjot ym tang ïa lade shimet bad u la pynjot ruh ïa ka ing ka sem bad haka imlang ka sahlang” u la bynrap.
Ban tehlakam na kine ki kam sniew khamtam na ka jingshah pyngngop ki samla ha u drok, ka KSU, North Khasi Hills District Unit ka la dawa ruh na ka sorkar ban buh ïa kita ki Recreational Centre ban ai jinghikai ïa kine ki samla ba la ngop ha u drok bad kiwei ki kam sniew bad ruh la donkam ruh banbuh ïa ki kynja Training Centre na ka bynta ki khun samla ban ai jinghikai halor ki bynta bapher bapher ba kin lah ban ieng ha la ki jong ki kjat la ka long ha ka kam seng kam seng jam ne kiwei kiwei ki kam ba ki samla kin klet na ki jingdih basniew.
Namarkata, na ka liang ka KSU North Khasi Hills District Unit ka la dawa na ka sorkar ba ka dei ban pynurlong ïa kitei ki jingdonkam ki khun samla naduh ka Recreational Centre bad kumjuh ruh ki Training Centre ha Ri Bhoi District bad kum ka seng kam kwah ba bun ki khun samla kin dang ngop ha u drok bad kiwei ki jingsniew kiba ktah ym tang ïa ka lawei ki khun hynrei ka lawei kaba phyrnai bad kaba khlain jong ka Jylla hi baroh kawei.
Ha kawei ka bynta, ka KSU North Khasi Hills District Unit, ka la pynpaw ruh ba ka dawa ym tang ban don noh kita kai ‘Recreational Centre’ bad ka ‘Training Centre’ na ka bynta ban saindur ïa ka lawei ki khun samla ka Ri Bhoi bad ha ka jylla bad kum ka seng ka la mih ruh ban pyrshah jur ban wan rah ïa ka Casino ha Ri Bhoi, namar ka seng kam kwah ba ka Ri Bhoi kan long ka ktem Khalai bad kin sa mih ruh ki kam kiba lah ban ktah wat ïa ka longrynieng jong ki khun samla kynthei bad shynrang.
Namarkata, ka seng ka dawa ïa ka sorkar ba kam dei ban wan rah ïa ka Casino ha Ri Bhoi la ka long ha kano kano ka jaka ne ka bynta ba hap ha u pud u sam ka Ri Bhoi bad lada ka sorkar kam sngap ïa ki jingpyrshah ka seng kum ka seng kam banse ban ïaid da kiwei ki lad ki lynti ban pyrshah halor kane ka jingthmu ban buh ïa ka Casino kaba long ka kam khlai kaba ktah ha baroh ki bynta jong ka imlang ka sahlang, u la bynrap shuh shuh.