Shillong, Naiwieng 18 : Hadien ka jinglah ban khur ïa baroh ki san tylli ki nam jop, ka kynhun ïalehkai jong kriket U-23 jong ka Meghalaya ka la pynkhreh pat mynta ban ïa khunpyrshah ïa ka Mizoram, ha ka lympung ïalehkai final jong ka U-23 Men’s State A Trophy, kaban long ha Mohali mynta ka sngi Balang.
Kane kan dei ka sien kaba nyngkong ba napdeng baroh ki kynhun ïalehkai ka jylla, dei tang kane kawei ka kynhun kaba la lah ba kan da jam shaduh ka phainal. Shwa kane, ka kynhun ka la ïoh ruh ïa ka jingkitbok kitrwiang na u President bad kumjuh na u Secretary jong ka Meghalaya Cricket Association u Nababrata Bhattacharjee bad Bah Raynold Kharkamni.
Ka lynti ïaid ïa ka kynhun ïalehkai jong ka Meghalaya ha kane ka lympung ka long ba ka la sdang shwa ba kan khur ïa ka jingjop da ki 93 ron pyrshah ïa ka Sikkim bad bynrap sa da ka jingjiop kaba long da 1 wiket pyrshah ïa ka Manipur. Hadien kane ka la ïoh pat ban pynliem ïa ka Arunachal Pradesh bad kumjuh ïa ka Nagaland haduh mar 8 wiket bad kaba kut da ka jingjop kaba 23 ron pyrshah ïa ka Mizoram ban pynskhem syndon ïa ka kynhun ban bat ïa ka kyrdan kaba halor duh ha ka miej khein point na ka group.
Napdeng ki nongïalehkai u Dipankar Baruah, u la lah ban kamai haduh 203 ron, bad dei tang ma u ban lah ruh ban kamai ïa ka spah ron (century) ha kane ka samoi ïalehkai ba mynta jong kane ka lympung, na ka jingïakhun kaba la dep pyrshah ïa ka Mizoram.
Naka liang ki nongkawang bol (bowler), ka Meghalaya ka don 5 ngut bad kine ki kynthup ïa u Manish Sharma, Gavineal Marpna bad Shavian Blah bad kine baroh ki la ïoh ban ïa khur mar 8 wiket ha kane ka lympung .
