Pyrshah ïa ka klob u Cristiano Ronaldo ïoh lad u samla Khasi ban mih aireng ha ka AFC Champions League

Shillong, Risaw 28 : Ka 22 tarik u Risaw ka la dei ka sngi kaban sah kynmaw ïa uwei na ki samla Khasi, u samla Rooney Kharbudon namar dei ha katei ka sngi ba une u samla u la ïoh ban mih madan pyrshah ïa ka kynhun ïalehkai jong ka Al Nassr FC kaba ïalam da u khlur ïalehkai phutbol ba bna nam ha ka pyrthei u Cristiano Ronaldo.
Kane ka jingïakhun kadei ha ka lympung ïalehkai jong ka AFC Champions League Two hapdeng ka Al Nassr pyrshah ïa ka kynhun jong u Rooney, ka FC Goa ïa kaba la pynlong ha Pandit Jawaharlal Nehru Stadium ha Margao.
Watla ha kane ka sngi u Ronaldo u khlem lah ban donlang bad ka kynhun hynrei baroh ki rangïalehkai ba kynsai tam jong ka Al Nassr ki la don lut ha kane ka sngi kynthup naduh ki rangïalehkai bna nam ka pyrthei kum u Sadio Mané bad u João Félix nalor kiwei kiwei.
Kumta, katei ka sngi ka la dei ka kabu ksiar ïa u Rooney ban ïoh kyrshut tyrpeng bad kiba bun ki rangïalehkai na ki ri ka pyrthei kiba ïalehkai na katei ka klob Saudi Pro League.
Lah ban kdew hangne ba ka FC Goa ka la ngat lang ha ka Group D jong ka AFC Champions League Two kaba kynthup lang naduh ka Al Nassr kaba dei ka kynhun ba khlain bor jong ka Saudi Pro League, nangta ka Al Zawraa SC bad kumjuh ka FC Istiklol.
Ha ka jingïakhun, ka Al Nassr ka la khur ïa ka jingjop da ki 2-1 kol. Ïa kine ki kol la ïoh ban pynkhih jar tang ha ka minit kaba 10 jong ka kylla step lyngba u Angelo Gabriel bad ïa ka kol kaba ar pat tang hadien katto katne minit kata ha ka minit kaba 26 lyngba u Haroune Camara. Nangta ïa ka shi kol jong ka FC Goa pat la ïoh ban thep da u Brison Fernandes ha ka minit kaba 41 jong ka kylla step hi.
Tangba sniewbok, ka jingshah rem ha kane ka sngi kadei ka jingshah rem kaba lai ban ban na ka bynta ka FC Goa ha ka ACL-2 hadien ba ka la mad ïa ka jingshah rem kaba nyngkong ha ka kynhun na Iraq ka Al Zawraa SC bad ruh ha ka kynhun na Tajikistan ka FC Istiklol ha ki ar tylli ki jingïakhun kiba shakhmat.
Kumba ka long mynta hi, ka Goa ka don sha trai duh jong ka miej khein point jong ka Group D na ki lai tylli ki jingïakhun katba ka Al Nassr pat ka la ïoh ban don ha khlieh duh da ki 9 point kata da kaba ïoh ban jop lut ha baroh lai sien ïakhun.
Ka jingïakhun kaba bud na bynta ka FC Goa pyrshah ïa ka Al Nassr kan long ha ka 05tarik u Naiwieng ha Al -Awwal Park Stadium ha Riyadh, Saudi Arabia.