Shillong, Iaiong 16 : Ki bor pahara khappud jongka India ki Border Security Force (BSF) ki la pyrkhing bha ka jingpahara ha khappud bad pyrkhing ruh ban talasi ïa ki trok kiba wan kiew na Bangladesh hadien ba la dep pynhap maw bad dewiong da kaba pyndonkam ruh da ki ksew ban sma ïa ki trok namar ki suba jur ba ki don ki trok kiba kit ïa ki tiar siat bad drok ha ka por ba ki wan phai na Bangladesh sha India.
Kane ka jingpyrkhing talasi ïa ki trok ka long ha man la ki kad khaïi ka India sha Bangladesh ne ki Land Custom bad kaba jur eh ka long ha Tamabil, Dawki, West Jaintia Hills.
Ki BSF ki la pynsma ïa ki trok ym tang kiba wan kiew na Bangladesh hynrei wat ïa kiba hiar sha Bangladesh ruh namar ki suba ïoh don ki mar ba ki kit ban khaïi tuh pat sha Bangladesh. Kane ka jingpyrkhing bad pyndonkam da ki ksew ka la sdang naduh mynta ka sngi, ïathuh ka tyllong khubor na ki BSF.
Ka jingtalasi kaba jur eh ka long ïa ki trok ba wan phai na Bangladesh hi. Kane ka jingsdang talasi ki BSF ka long ruh hadien ba la ïai ïoh kurup ïa ki tiar siat kum ki suloi bad pistol Automatic ha kane ka jylla khamtam sha ri lum Garo wat hadien ba ym don kynhun kieng atiar shuh namar ki dang don hapdeng ka jingkren ïasuk bad ka sorkar pdeng bad ka sorkar jylla kata ka ANVC katba ïa ka GNLA la lah ban rat dyngkong naduh tynrai hadien ba u Chairman jongka ula shah kem bad hadien ba u la lait ruh u khlem leit rung shuh sha ka seng. Nalor kata ka jingtroiñ jongka seng GNLA ka long khamtam eh hadien ka jingshah siat iap u Commander In Chief jongka u Sohan D Shira.
Kumba long mynta ki don ki kynhun pyntriem kiba lute bad rahbor ïa ki nongkhaïi ha ri lum Garo hynrei kaba pynlyngngoh ïa ki pulit ka long ba kine ki pyndonkam beit da ki suloi AK-47 bad pistol 9mm ki tiar ba ju pyndonkam tang da ki kynhun kieng atiar bad ki bor pulit.
Ha ki por mynshwa ki pulit ki ju ïoh kurup tang ki SBBL, suloi tynsah, ki suloi shna hi da ki dieng ki wait khukri bad kiwei kiwei ki tiar pynmynsaw na kum kitei ki kynhun nonglute hynrei mynta ka kynti la arsien ki pulit haba ki ïoh siat iap ïa ki kynhun nonglute ki ïoh kurup beit da ki suloi AK-47.
Lah ban pynkynmaw ba u myntri ba rim ka jylla uba long mynta u nongïalam ka Liang Pyrshah u Dr Mukul Sangma u pynpaw ka jingsngewdiaw ïa ka jingjyllei ki tiar siat ba khlaiñ bor kaba pynpaw ba ki dang don ki kynhun kieng atiar ha ri lum Garo kiba la ïoh jingpyntbit na u nongïalam ka ULFA-I u Dristi Rajkhowa shwa ba un leit pyndem ha ki pulit ka South Garo Hills.
