Shillong, Jylliew 22: Ka Tnad MeECL kan sa pynjari ïa ka kyndon ba haduh katno ka jingkhia jong ki kali ba lah ban ïaid na jingkieng Umïam hadien ba la dep ban shna pynkhlaiñ ïa ka Dam bad pynbha ïa ka jingkieng.
Haba pyntip ïa kane u Chairman-cum-Managing Director (CMD) ka MeECL Sanjay Goyal ula ong, “Ka jingbuh kyndon kan don beit bad ngan kren da kaba shai ba kane ka jingpynkhlaiñ ïa ka dam bad jingkieng ka long eh ban pynneh ïa ka kumba ka dei ban long khnang ba kan nym don shuh ka jingjulor jong ka jingkieng hadien habud”.
Halor kane haba ïakren bad ki lad pathai khubor, “Ngi dang ïakren bad ka Indian Institute of Technology (IIT), Guwahati bad shen yn sa wanrah ïa ka jingpynbna halor ki kyndon ba buh ïa ka jingkhia ki kali hadien ba la pyndep lut ïa ki jingshna baroh bad ngin sa pyrshang ban pynthikna ba kine ki kyndon kin dei kiba bud thik pa thik khlem da don kiba pynkheiñ.”
U Sanjay Goyal ula ong ba ka tnat ka la buh ïa ki CCTV camera ban pynthikna ba ki kali ba kit khia kim dei ban ïaid shuh lyngba ka dam.
Katkum ka jingïathuh jong u, ka jingshna pynkhlaiñ ïa ka dam bad ka jingkieng kan dep haba kut jong u Naitung. Kumba T.24-25 klur la pynlut haba pyntreikam ïa kane ka project.
“Kane ka dei ka jingtei u paidbah bad ka jingthmu jong kane ka jingtei ka long ban pyniasoh, bad ngin nym leh satia ïa kano kano ka kam ka ban pynjulor ïa ka jingkieng bad buh ha ka jingma.
Lyngba jong phi nga kwah ban ong ba kane kam mut ba mynta kane ka jingkieng ka la plie ïa baroh ki kali ba kin ïaid,” ong u CMD ka MeECL.
