Pyrkhat bha shwa ban pyntreikam ïa ka jingpynïaid Odd/Even ha nongbah Shillong : Bah PT Sawkmie

Shillong, Jylliew 04 : U MLA barim ka Mawlai, Bah PT Sawkmie ha ka sngi U Blei u la kyntu ïa ki bor pynïaid distrik jong ka East Khasi Hills ba kin pyrkhat biang halor ka rai ban pyntreikam noh ïa ka jingpynïaid Odd bad Even number ïa ki kali kamai kiban ïaid na ki ar tylli ki jaka iew ba heh tam haka jylla, kata lyngba ka Khyndailad bad ruh ka Motphran.
“Ka jingthmu jong ki bor pynïaid distrik ban weng ïa ka dheng kali ha ka nongbah da kaba pyntreikam ïa ka Odd bad Even number ïa baroh ki taksi kamai donkam ban pyrkhat biang shwa da ki bor distrik halor ka nongrim ba katei ka sienjam kan ktah pynban ïa ki kali kamai,” ong utei u MLA barim ha ka kyrwoh.
Shuh shuh u ong ruh ba kano kano ka polisi ba wanrah da ka sorkar ki dei ban long na bynta ki paidbah bad kumta dei ban kiar na ki polisi kiba ktah ïa ki paidbah ba duk ba suk.
Da kaba kam ba ki kali kamai ki hap ban siew bun bha ka khajna, u Bah PT Sawkmie u la ong ba ka sorkar kadei ban pyrkhat bha shaphang ki jingeh kaba ki kynduh.
Lah ban kdew hangne ba ïa katei ka jingïaid Odd-Even number la thmu ban pyntreikam noh naduh kane ka sngi Nyngkong, ka 05tarik Jylliew.
Ki bor pynïaid distrik ki la dep pyntip ruh ba ka rai ban pyntreikam ïa katei ka Odd bad Even kadei halor ka hukum jong ka Meghalaya High Court ban teh lakam ïa ka jingkhapngiah ha nongbah Shillong.
Hynrei halor kane, na ka liang ki kynhun jong ki nongniah kali kamai ki la pyrshah jur ïa ka rai jong ki bor distrik bad buh jingkylli ruh ïa ka jingbym lah jong ki ban pyntreikam lang salonsar wat ïa ki kali jong ki riewshimet da kaba ong ba ma ki ruh ki don kajuh ka bynta ban wanrah ïa ka dheng kali ha ka nongbah.