Mawkyrwat, ‘Nailar 19: Ka Nonglang Sports Club ka la pynhap pyrda noh ïa ka Women’s League Football Tournament jong u snem 2023 – 2024 mynta ka sngi 19-08-2024 ha madan Pyndenïewlyngdoh, Nonglang, South West Khasi Hills District.
Ha kane ka lympung ïalehkai kynjatbol ka Pyndenbah FT ka la jop ïa ka Pyndenjathang FT da 3 – 0 kol ha kaba ka jingïalehkai ka la long shisha kaba itynnad bha bad tangba ha kaba khatduh ka Pyndenbah FT ka la ïoh thep 3 kol ha ki minit kiba sah jong ka jingïaleh ha ka kyllamiet.
Lah ban kdew ba ha kane ka lympung ïalehkai kynjatbol ki don baroh 5 tylli ki kynhun kata ka Mawphorkynbat FT, Pdengshnong FT, Lawmyrsiang FT, Pyndenbah FT bad Pyndenjathang FT).
Ïa kane ka Women’s League Football Tournament jong u snem 2023 – 2024 la wan ban pynhap pyrda da u samla Dawningstar De Peter Marweiñ kum u kongsan bad ka kong Balutmon Nengnong kum ka symbud kongsan ha ka jingïadon ryngkat ki ‘riew rangbah bad ki samla jong ka shnong bad ka thaiñ jong ngi.
Ha kane ka sngi, ka Nonglang SC ka la ïoh ruh ban pynkup burom mynta ka sngi ïa ka samla Darishisha Kharlyngdoh kaba la wanrah burom ïa ka shnong, ka district, ka state bad ka dong ka thaiñ hi baroh kawei kaba ka la ïoh khusnam nongïalehkai batbit ha ka jingïalehkai ha ka Football Delhi Women’s League (Premier League 2022- 2023).
Kane ka long katkum ka kyrwoh khubor ba la phah da u Secretary jong ka Nonglang Sports Club, u bah Kordorlyne Kharlyngdoh.
