Shillong, Nohprah 06: Ka Meghalaya High Court ha ka sngi Thohdieng ka la pynkutnoh ïa ka mukotduma PIL hadien ba ka jinglong jingman hapoh ka skulbah North Eastern Hill University (NEHU) ka la long kaba jai jai.
Haba pynmih ïa ka jingbishar bad ka hukum jong ka, ka meij kaba kynthup ïa u Chief Justice IP Mukerji bad Justice B Bhattacharjee ka la ong, “Kane ka Ïingbishar ka la ïohi ba ka jinglong jingman hapoh kane ka jaka pule NEHU, kumba la pyntip da P Yobin, advocate ba la pynpaw ba ka jinglong jingman hapoh ka skulbah ka la long kaba jai jai bad ka la long kum kadei ban long. Ka jingpynlong ïa ki exam la pynkynriah bad ba ka jingpynlong ïa ki Class ruh ka la sdang.”
Ha ka hukum la ong ruh ba ka jingtohkit da ka committee ba la thaw da ka Ministry of Education, Department of Higher Education, New Delhi ka la sdang ïa ka kam bad ba ka la pynjlan ruh ïa ka por ban aiti ïa ka kaiphod kumba la ai jingbit da ka sorkar pdeng.
Ïa kine ki jingshisha la pynskhem ruh da u K Khan, AAG ba la mihkhmat ïa ka sorkar jylla, bad S Sen, counsel ba la mihkhmat na ka liang jong ka University bad K Gurung, counsel ba la mihkhmat da ka Union ka India.
“Ngi tharai ba kane ka jingthmu ha kaba ïadei bad ka public interest litigation la dep ban pynlong. Namar kata ngi la pynkut noh ïa kane ka jingkyrpad kumba la ïohi ha kane ka jingpynpaw, da kaba ai laitluid ruh ba ki lah ban ujor biang da kaba thymmai, lada ka dang mih biang hadien habud,” ong shuh shuh ka meij ki nongbishar hapoh ka hukum ba la pynmih ha kane ka sngi.
