Pynwai ka ïing Bishar HC ïa ka mukotduma ba ujor ka shnong Urksew Wahpathaw ïa ka KHADC

Shillong, Rymphang 3 : Ka ïing Bishar High Court jongka jylla ka la pynwai noh ïa ka mukotduma ba la ujor da ka Dorbar Shnong Urksew Wahpathaw bad u Rangbah Shnong jong ka u bah Archalson Lyngdoh pyrshah ïa ka shithi ba la thoh da ka Khasi Hills Autonomous District Council (KHADC).
Kat kum ka jingujor la pynpaw ba ka Dorbar Shnong ka pyrshah jur ïa katei ka shithi kaba la phah ha ka 21 tarik Kyllalyngkot 2026 da kaba kynnoh ba ka KHADC ka phah lum ïa ka Dorbar Shnong na ka bynta ban jied Rangbah Shnong kaba long markongpong bad ka rai jongka ïing Bishar ba ka long tang ban pynbeit ïa ki kyrteng jong ki nongthep vote.
Hynrei ka ïing Bishar ba la khlieh da u Nongbishar Justice H.S Thangkhiew ka la pdiang ïa ka jingthoh ba la phah da ka KHADC ba ka jingphah lum ïa ka Dorbar ka long tang ban pynbeit ïa ki kyrteng ki nongthep vote kam dei satia ban pynlong ïa ka election. Haba ka bishar ïa ka shithi ruh ka la lap ba kam don satia kano kano ka senten kaba thoh ba ka jingkhot Dorbar ka long ban jied Rangbah Shnong ha katei ka juh ka sngi.
Kumta ka ïing bishar ka lap ba ki nongujor ki la ujor sha ka ïing bishar khlem da pynhisha bad dei tang ha ka jingmutdur suda. Kumta na kata ka daw ka ïing bishar ka la pynwai noh ïa kane ka mukotduma.