Nongstoiñ, Jymmang 03: Ka surok ka dei u budlum jong ka ïoh ka kot, ka kit ka bah, ka kamai kajih ka leit ka wan bad kaba dei ruh ka bynta kaba donkam tam na ka bynta ki paitbah nongshong shnong. Ha ki snem ba la dep ka surok Kynshi Myrïaw, ka dei kaba la sniew haduh katta katta, ha kaba ki paidbah nongleit nongwan ki la ud la nam namar ka jingeh ba ki mad ha ka kit ka bah.
Hynrei ar snem hadien ba u bah H.Brolding Nongsiej Myntri ka tnad Water Resources & Home Gaurd jong ka sorkar jylla, u la kular ha ki paitbah ka thaiñ ha ka 19 tarik Lber 2019 ha ka por ba u la shah khot kum u kongsan ha ka jingplie ïa ka Rural Health Centre, mynta pat ka jingkular jong u ka la urlong namar ka jingpynheh bad siang rong ïa katei ka surok ka la ïaid shait shait, ha kaba phra kilomitar la pyndep ban siang rong bad kaba sah ka long satang kumba san kilomitar ei ei. Hynrei ïa katei kaba dang sah ruh la dep siang mawria bad lada ka mariang ka dang ai lad, tang hapoh shi bnai la lah ban pyndep lut. Nalor kata ïa kawei ka jingkieng kaba jrong kumba laiphew mitar bad ki jingkieng rit ka jingtrei ka la ïaid shait shait.
U bah Mikstar Marngar sordar jong ka shnong Myrïaw haba ïakren bad u nongthoh khubor, u la ong ba mynshuwa ka la don ka jingpruid dak ban shna da ka surok ar laiñ naduh na Kynshi haduh Mirza kaba hap ha Kamrup Assam, ka ban ïaid lyngba ka shnong Myrïaw haduh Nongthymmai kaba don ha ki thaiñ Mawdoh, hynrei ym lah ban tip na kaei ka daw ba katei ka projek kam shym la urlong.
U la ong ruh ba hadien ba katei ka jingthmu kam shym la seisoh, u MLA ka Mawthadraishan u la trei shitom ha kaba ka Ministry of Road Transport jong ka sorkar pdeng, ka la mang pisa lyngba ka skhim Rural Infrastructure Development Fund (RIDF), ha kaba la lah ban pyntrei wut wut ïa katei ka surok. U la ong ruh ba ka jinglah ban pynbha bad siang rong ïa katei ka surok ka la long ka jingkyrkhu kaba khraw ïa ki paitbah ka thaiñ.
U bah G.Parïong uwei na ki riew rangbah jong ka shnong Mawkamoit, u la ong ba ha kine ki snem ba la dep, ki nongrep katei ka thaiñ ki mad shibun ki jingeh. Khamtam naduh u bnai Naitung, namar ka aïom kheit soh saw ka la sdang bad ki nongrep sohsaw ki hap ban kit da ki Mahindra pickup ban pynpoi ha kylleng ki ïew hapoh ka jylla bad haduh Assam, ki shem shitom namar ka bai kit ka rem palat na ka daw jong ka jingsniew ka surok.
Hynrei, u kyrmen ba nangne shakhmat ka bai kali ban kit ïa ki mar rep kan kham duna namar ka surok ka la bha. Na ka liang ki paitbah nong shong shnong pat ki la pynpaw ïa ka jingsngewnguh bad ki la ai khublei kyrpang ïa u MLA, namar ki kam ka la urlong kumba u la kular.
