Shillong, Nailur, 28: Ka Khasi Hills Autonomous District Council kaba la thaw ïa ka Khasi Hills Building Structure Regulatory Authority (KHBSRA) ka la rai ban pyntreikam noh ïa ka Meghalaya Building Bye Laws 2021 lane ka aiñ shna iing hadien ba ladep ïapynbeit bad ka tnat Pynroi Sor jong ka Sorkar Jylla.
U Executive Member ka KHADC u Bah Paul Lyngdoh uba long ruh u Chairman jong ka Khasi Hills Building Structure Regulatory Authority ha ka jingïakren bad ki lad pathai khubor ha ka u la ong ba ïa kane ka aiñ shna ïing yn sa pyntreikam ha baroh ki jaka kiba hap hapoh u pud u sam jong ka District Council hynrei lait noh ki jaka Sorkar ïa kiba la tip kum ka European Wards.
U la ïathuh ruh ba ki longïing kiba kham duna ka ïoh ka kot kiba hap hapoh ka EWS-I bad ka EWS-II ha kaba ka jaka shna ing kam dei ban palat ïa ka 50 mitar kim donkam ban siew eiei bad ka jingsiew na ka bynta ban ïoh jingbit ban shna iing ka kham duna dor ba la buh da ka District Council ban ïa kaba la buh da ka Sorkar.
U Bah Paul u la ïathuh ba ka jingpyntreikam jong ka District Council ïa ka Building Bye Laws ka long ban pyrkhing ïa ka jingshna ïa ki iing ki sem khamtam ha kum kane ka por ba ka kam jngohkai pyrthei ka la nang kiew bha artet.
“Na kata ka daw ka jingmih jong ki iing basa kum ki Home Stay, ki Hotel, ki Guest House ka la donkam ïa ka Council ban pyntreikam noh ïa kane ka aiñ khnang ban tehlakam ïa ka jingshna beaiñ khlem da ïoh jingbit,” ong u Bah Paul.
U la ai nuksa ba katkum ka khubor kaba la mih ha ki lad pathai khubor ïa ka Cafe jong u Bah P. Ïawphniaw bad ka Guest House and Restaurant jong ka Kong B. Khongwar ladep ai notis da ka Iingbishar Meghalaya High Court ba ki long be-aiñ bad ki bym shym la ïoh jingithuh.
“La ong ïa kine ki trai ba ki dei ban da ïoh jingbit shwa na ki bor jong ka District Council khnang ba kin dup lah ban ïaid shakhmat namarba ki jaka ha Umïam ki dei kiba dang hap hapoh ka jingpeit jingkhmih jong ka Council,” u la ong.
U la pyntip ruh ba ki paidbah ki lah ban ïoh ïa ki Form pan jingbit shna iing na ka ophis treikam jong ka KHADC ha Shillong, Mawkyrwat, Nongstoiñ bad Nongpoh.
“Ka District Council kan ym pynslem satia ban ai ïa ka jingai jingbit lada ki jingdonkam jong ki nongpan jingbit ki lah ban pynbiang katkum ki kyndon ba la buh,” la bynrap u Bah Paul.
U la pyntip ruh ba ki don haduh 400 tylli tam ki aplikeshon ba la aplai na ka KHADC ban shim ram na ki Bank na ka bynta ban shna iing. “Ngi la ïoh ban ai jingmynjur na ka tnat Building Bye Laws bad halor ka shithi jong ngi nangne, kiba aplai ki la rah ïa ka shithi kaba long kum ka Letter of Assurance sha ki Bank bad ka Bank kan mynjur ban mang pisa na ka bynta ka ram,” u la ong.
Katkum ka jingïathuh jong u Bah Paul, ki don ruh ki jait jingtei kiba bym donkam ban pan jingbit ban shna iing kum ki ïing trep bad ki ïing tap shiliang. Ki don pat kiba donkam ïa ka jingpan jingbit tangba kim donkam ban siew pisa, kata kum ki jaka mane blei.
“Nalor kane, ka jingkyntu jong nga ka long ba ki paidbah kin bud pyrkhing ïa ka Building Bye Laws jong ka Council namarba ki la don ki khep ba ki jia ki jingjia kiba wanrah ïa ka jingïap ki briew na ka jingkhyllem ki ing ki sem bad don ruh ki khep ba ka jingshna iing ki khang noh ïa ka lynti ïaid jong kiwei pat na ka jingkyntur sha surok, Kiba bun ki shnong lada don ki jingpluh iing, ki kali kim lait rung namarba ki ïing ki sem kim bud ïa ka Building Code,” u la ong bad bynrap, “nga kren shai ïoh ki don ka jingkulmar jingmut lada ki don halor ka Bye Laws jong ka MUDA bad ka Bye Laws jong ka District Council.”
Haba kylli, u Bah Paul u la ong, “ngi kham pynleit jingmut bha mynta ïa ki Commercial Building namarba la bun shaba palat ka jingujor ïa ka jingshna da kaba pyntuid jaboh sha ki wah ne ki wahduid lane ki kyntur palat na ka jaka ba la ai ïa ki bad don ruh ki bym biang ki dulir lane ki kot ki sla. Kata ka dei ka jingsngew khia jong ngi. Ngin pyntreikam ïa kane (ka Building Bye Laws) katkum ka bor ban la ai ha ngi.”
