Pyntreikam ïa ka Smart City Project da kaba pynkynriah ïa kiba sah ha Them Ïew Mawlong

Shillong, Jylliew, 23: U Chairman jong ka Rympei Kyrsiew Jaidbynriew, Bah Shiningstar Lyngwa u la dawa ïa ka Sorkar Jylla ban kynthup ïa ka Them Ïew Mawlong kaba long ka pdeng jong ka khaii ka pateng ha nongbah Shillong, hapoh ka Smart City Project.
Ha ka jingïakren bad ki lad pathai khubor ha ka 15 tarik mynta u bnai u Bah Lyngwa, u la ong, ba ka Sorkar Jylla kam shym la lah ban pyntreikam ïa ka Smart City Project haduh kine ki sngi namarba ym pat don dak eiei satia lait noh tang ki jingshna thymmai ba dang ïaid shakhmat jong ka Ïew Shyllong, ha Laitumkhrah, Shillong.
“Ngi la thaw ïa ka ‘Rympei Kyrsiew Jaidbynriew’ kum ki nongshong shnong jong ka jylla namar ka jingsngewkhia halor ka jinglong jingman hapoh ka nongbah Shillong khamtam ha kaba ïadei bad ka khuid ka suba bad ka jingdheng kali kaba jur, namarkata ngi dawa ïa ka Sorkar Jylla ba kan sdang noh ban pyntreikam ïa ka Smart City Project ha Them Ïew Mawlong bad ha kiwei kiwei de ki bynta jong ka nongbah Shillong,” ong u Bah Lyngwa.
U la ong ba ka Them Ïew Mawlong kaba ju long ka kad khaii pateng ka la jaboh haduh katta katta bad ba la donkam ban pynkhuid noh mardor da kaba pynkynriah ïa ki briew kiba sah ha kane ka jaka khnang ban pyntreikam noh ïa ka Smart City Project.
U la bynrap, “naduh ba ka Them Ïew Mawlong ka la kylla long ka jaka ïew ïadie ïathied, ki jaidbynriew Sikh kim lah ban kam trai bad kim lah ban dang ïai bteng ban sah ha kane ka jaka bad ka Sorkar ka dei ban shim da rai kaba shlur ban pynkynriah beit ïa kiba sah ha kane ka jaka.”
Ki nongkitkam jong kane ka kynhun ba dang shu pynkha thymmai ki kynthup ïa u Vice Chairman u Dr. WA Lyngwa, General Secretary u Dr. Joseph Syiemlieh, Social Secretary Bah Ronnie M. Rani, Organising Secretary Bah Franky Lyngdoh Nongbri, Finance Secretary Bah Krispin Ryntong bad Publicity Secretary Bah Tammki Mawthoh.