‘Pyntreikam da ka Aiñ ka Sorkar Pdeng,’ dawa ka kynhun ki nongdie madan ïa ka Sorkar.

Shillong, ïaïong, 15: Ka MGSPHSVA kaba dei la kynhun jong ki nongdie madan ha ka sngi Palei ka la dawa ïa ka Sorkar Jylla ba ka dei ban pyntreikam noh mardor ïa ka aiñ ba la shna da ka Sorkar Pdeng kaba la tip kum ka, “The Street Vendors (Protection of Livelihood and Regulation of Street Vending) Act, 2014 bad kaba ladep shon muhor da u President jong ka ri India.
Ha ka jingïakren bad ki lad pathai khubor hadien ba ladep aiti ïa ka dorkhas ha ka Chief Secretary ka Jylla ka Kong Rebecca V. Suchiang, ka Kong Angela Rngad kaba dei ka Convenor jong ka TUR, ka la ong, ‘ryngkat bad kane ka dorkhas ngi la ai ïa ki jingai jingmut kumno ban pyntreikam ïa ka Aiñ bad la ai lang ruh ïa ki Rul ba la pynkhreh da ka Seng ki nongdie madan.”
Ha ka jingïakren kaba la neh kumba 15 minit eiei, ki nongïalam jong ka MGSPHSVA, ki la pynshai bad kdew kumno ban pyntreikam ïa ka aiñ kyndon pa kyndon bad da ka jingïatreilang yn lah ban pynbeit bad ha kajuh ka por ban ïada ïa ka hok kamai jakpoh jong ki nongdie madan bad ban pynkylluid bad pynitynnat ïa ka sor Shillong.
Ka MGSPHSVA, ka la pynkynmaw ruh hadien ba ka Parliamentary Standing Committee jong ka Ïingdorbar Thawaiñ ka ri India kaba peit ïa ka Housing bad Urban Affairs ka lah tohkit bniah ba balei ba ka Jylla Meghalaya kam shym la pyntreikam ïa ka Aiñ jong ka Sorkar India , kata ka (Protection of livelihood and Regulation of Street Vending) Act 2014.
“Ka Parliamentary Standing Committee ka shem ruh ba ki kyndon kiba don ha ka Aiñ kaba la thaw da ka Sorkar Jylla na ka bynta ki nongdie madan ki ïatyngkhuh bad ki kyndon jong ka Aiñ ba la thaw da ka Sorkar India bad kumta ym lah ban pyntreikam. Kumta ka Parliamentary Standing Committee ka la bthah ïa ka Sorkar Jylla ban shna noh ïa ki rul bad pyntreikam noh ïa ka Central Act kloi katba lah,” ong ka Kong Angela.
“Ka MGSPHSVA ka sngewkmen ba kaei kaba ki la dawa mynta la jan hynriew snem kynthih ka lah ban urlong. Naduh u snem 2016 ka Seng ki nongdie madan ka la ïakhih tyngeh, ka la phah da ki phew tylli ki dorkhas bad ki jingthoh sha ka Sorkar Jylla ban pyntreikam ïa ka Central Acr. Hynrei kaba sngewsih ba ym don uwei ruh u Myntri Pynroi Sor lymne ki heh Sorkar kum ki Chief Secretary bad kiwei ki ban patiaw, pynban ki sngap kuman bad ki leh bym suidniew ïa ki jingdawa bad jingai jingmut jong ki nongdie madan kiba long ruh ki nongshong shnong,” la kynthoh ka Kong Angela.
“Ka seng ka sngew ba la pynsepei ïa ka por, ka bor bad la bijai ei la ka ïoh ka kot bad ka kamai kajih. Sa shisien pat ka Sorkar Meghalaya ka la shet thai da lade ïa lade bad pynpaw ba kam lah treikam tat haduh ban da shah dumok ha ka Sorkar India na Delhi. Ïa kane ka jingduna lah ban kiar ban jin lada ka Sorkar Jylla bad ki heh Sorkar ki long syntan bad sngap kuman ïa ka jingud jingnam ki nongshong shnong. Da ka jingïatreilang lah ban pynitynnat ïa ka nongbah Shillong bad pynlong ïa ka ka shnong ban ïa imlang mar ryngkat,” ka la ong.
Ka Seng ki nongdie madan ka la ai ruh ha ka kti jong ka Chief Secretary ïa ki jingai jingmut kumno bad ha kano ka dur ki nongdie madan kin pynïaid ïa ka kamai kajih jong ki.
“Na ka liang ka Seng ngi khmihlynti ba ka Sorkar Jylla kan ym pynslem shuh ïa kane ka kam,” la bynrap u General Secretary ka MGSPHSVA u Bah Shane Thabah.