Shillong, Ïaïong, 19: Watla ka jingïapynbeit pud hapdeng ka Sorkar Meghalaya bad ka Sorkar Assam ka dang ïaid shakhmat hynrei ka Sorkar Assam ka dang ïai bteng ban kyntur pud sha u pud u sam jong ka Jylla Meghalaya.
Dang shen ki ar ngut ki Myntri Rangbah ka jylla Assam-Meghalaya ki la ïasoi ïa ka Memorandum of Understanding (MoU) hakhmat u Myntri ka tnat Kam Pohing ka Sorkar Pdeng u Amit Shah ban pynkut noh ïa ka jingïakajia pud kaba la neh san phew snem kynthih.
Hynrei kaba lyngngoh ka long ba ka Sorkar Assam ka la nang ïai kyntur pud ha ki shnong khappud kiba hap hapoh ka Hima Jirang, Ri Bhoi District da kaba tih ïa ka surok PMGSY naduh ka shnong Amring-Narling shaduh ka shnong Umshalani Jirang. Kine ki shnong ki dei kiba hap hapoh ka Jirang C&RD Block bad Hima Jirang, Ri Bhoi District.
Ka thymmei khubor ka ïathuh ba kane ka surok PMGSY ba la tih da Assam kaba dang ïaid shakhmat naduh ka shnong Amring shaduh ka shnong Narling bad kan poi haduh Umshalini. Kine ki shnong ba don ïa ki Dulir longtrai ïa ka khyndew ne Patta na u Syiem jong ka Hima Jirang bad ki skhim pynroi baroh ki ïoh napoh Jirang C&RD Block jong ka jylla Meghalaya.
La ïathuh ba ka Assam kan pyntrei beit ïa kane ka surok PMGSY lyngba ka pung dohkha jong u Rangbah Shnong ka shnong Umshalini bad kan long ka jingduhnong ba khraw ïa kane ka longiing bad ïa ka shnong baroh kawei.
