Shillong, Nailur, 26: U Symbud Myntri Rangbah uba khmih ïa ka tnat District Council Affairs (DCA) Bah Prestone Tynsong ha ka sngi Thohdieng u la pynthikna ïa ka jingphah shithi iehnohkam da u CEM ka KHADC Bah Shemborlang Rynjah sha u Lat ka Jylla CH Vijayashankar bad kyrpad ruh ïa u Lat ba un ailad ïa u Bah Rynjah ba un dang bteng kum u nongpeit ba shipor tad haduh ban da ïoh ïa u CEM ba thymmai ynda la pynlong ïa ka elekshon.
“Hynnin hi ka sngi, ngi la phah ïa ka shithi iehnoh kam sha u Lat bad ngi la dep ban ai jingmut ïa u Lat ba un ailad ïa u CEM barim ka KHADC uba la iehnohkam Bah Shemborlang Rynjah ba un long kum u nongpeit ba shipor tad haduh ban da long ka elekshon jied CEM ba pura,” la ong u Bah Tynsong ha ka jingïakren bad ki lad pathai khubor.
Haba kylli hato ka NPP kan pynieng kyrtong neem ha ka elekshon jied CEM, u Symbud Myntri Rangbah u la ong, “ngam dei u dkhot jong ka District Council. Ka jingkylli kam mih tang na ka NPP. Namarba ngi don lang ha ka liang pyrshah, nga tharai ïa kane ka mat phi lah ban ïakren bad u nongïalam liang pyrshah ha KHADC.”
Ïa ka elekshon ban jied CEM la pynbna ban pynlong ha ka 30 tarik, mynta u bnai.
Ka Voice of the People Party (VPP) ka la jied ïa u MDC ka Nongthymmai Bah Winston Tony Lyngdoh kum u kyrtong CEM ha ka sngi Palei.
