Pyntip u DGP sha ka HC ba ki trai ki coke plant be-aiñ ki dei kiba shong ba sah ha Guwahati

Shillong, Jylliew 12: U Director General of Police jong ka jylla u la aiti ïa ka affidavit sha ka iingbishar ba ha khlieh duh ka jylla ba ki trai ba pynïaid be-aiñ ïa ka jaka thang rnga dewïong (Coke plant) be-aiñ ha ka jylla ki dei ki briew kiba shong ba sah ha nongbah Guwahati jong ka jylla Assam bad u la pyntip ruh ba ka jingthep bad sei pisa benami ruh ka don ha kaba ïadei bad kane ka jingpynïaid ïa kane ka kam.
Na ka liang u Shailendra Kumar Sharma u nongujor ïa ka mokotduma lyngba ka PIL u la pyntip ba kine ki nongpynïaid ïa kine ki coke plant be-aiñ ha ka jylla ki ïaid sahuh ha sor Guwahati bad ka ïaid ka ïeng jong ki ruh ki ïaid beit haba shit ba shai ‘ha kaba ngi tip pylleiñ pylleiñ ïa ka leit ka wan bad ka jaka ba ki treikam,’
Haba shong ishar ïa kane ka moktduma da ka kashari jong ki lai ngut ki nonbisharba kynthup ïa u Chief Justice ka High Court (HC) of Meghalaya u Justice Sanjib Banarjee, u Justice W Diengdoh bad u Justice HS Thgangkhiew ki la pynmih ïa ka hukum kaba ong, “ngi khmih lynti ba ka tnat pulit ka jylla kan leh la ka bynta kat kum ki kyndon jong ka aiñ bad kin ym pynslem ïa kane kloi katba lah”.
Ka kashari ka la bthah ruh ba u DGP un aiti shuh ïa ka kaiphot halor kane sha ka kashari hapoh lai taiew.
Na ka liang u Justice BP Katakey u la aiti ruh ïa ka 14th Interim Report, bad ha kane ka kaiphot u la pyntip ïa la jingjyllei ka jaka thang rnga dewïong(coke oven plant) bad ka jaka saiñ nar alloy (ferro alloy plant).
Kat kum ka kaiphot ba la aiti sha ka kahsari la pyntip ba ki don 13 coke oven plant kiba treikam ha East Jaiñtia Hills bad 38 tylli pat kiba ym treikam eiei.
Ha West Jaiñtia Hills ki don ar tylli ki coke oven plant kibym treikam bad South West Khasi Hills ki don hynriew. Ha West Khasi Hills District ki don saw tylli ki coke oven plant kiba treikam bad 61 kiba ym treikam bad ha Ri-bhoi pat ym don kawei ruh.
Katba ki ferro alloy plant kiba treikam ha West Khasi Hills ka don kawei ha Ribhoi pat ki don 7 katba kiba ym treikam ki don ar.
Na ka liang ka kashari ka la pyntip ruh ba ha ka paragraph 8 jong kane ka Interim Report ka la pyntip ba ïa ka jingtreikam kine ki karkhana la ki la ïoh jingbit ne em.
“Ka long kaba ym lah ban pdiang ba kane ka jingtip kaba la aiti sha ngi da u Justice Katakey ha ka kaiphot ban ong ba kan ym don bad ka sorkar bad ban ong ruh ba ka sorkar kam leh eiei ban teh lakam ïa ka jingtreikam kine ki coke oven plant bad ferro alloy plant khlem kano kano ka jingbit na ka sorkar,” ong ka hukum.
Ka kashari ka ailad ruh sha uba ujor ïa kane ka mokotduma ba kin ai jingtip shuh shuh ïa ki trai ba pynïaid be-aiñ ïa kine ki karkhana.
“Ka sorkar ka dei ban peitngor ba kine ki karkhana ki ïoh dewïong ban treikam naei bad ruh ban peit ngin ïa ka jingtreikam kine ki karkhana,” ong ka hukum.
Ka kashari kan sa shim bishar biang ïa kane ha ka 7 tarik Naitung 2023.