Nongpoh, Nailur 03: U Deputy Commissioner ka Ri Bhoi, u Arpit Upadhay hynnin ka sngi lyngba ka kyrwoh ba la phah sha ki lad pathai khubor, u la pyntip paidbah ba ka sorkar kmie lyngba u President ka ri India u la plie paidbah ïa kata ka ‘Advancing North East’ ha ka 4 tarik u Jymmang 2022 ba la ai buit ne shim khia da ka NEC lyngba ka Ministry ka tnad Development, North East Development Region ka sorkar India bad kane ka jingplie ïa kane ka Advancing North East ka dei shi bynta ban kyntiew ïa ki khun samla.
Kumba la pynshai da u Deputy Commissioner ka Ri Bhoi, kane ka Advancing North East ka dei kata ka Digital platform bad ka Web based ba la tip kum ka Advancing North East ha ka dur jong ka Web Portal bad ki mobile app ba ka thong ka long ban kyntiew ïa ki khun samla ha ka liang ka pule ka puthi, ka ioh kam ioh jam bad ha ki kam seng kam seng jam ban kyntiew ïa ki khun samla ka thaiñ shatei Lam Mihngi ka ri India.
Kane ka web portal ka don ïa ka thong ban kyntiew ïa ki khun samla ba kin tip ban shim ïa ka rai ha ka jingïaid lynti jongki ban im jakpoh ïa lade, ha ka liang ka rukom wad kam wad jam bad kumjuh ruh ha ka liang ka seng kam seng jam ba la phah ha ki lad bynta ba la tip ha ka ktien nongwei kum kata ka Education, Employment bad ka Entrepreneurship.
Lyngba kata ka Education portal ka ai jingtip kaba bniah ïa ki khun samla ban tip shaphang ka rukom treikam jongki, ban ïaleh ïa ki exam bapher bapher ban leit pule ha ki skulbah bapher bapher la ka dei ha ka National bad International ba kin lah ban pule kham shajrong ha ki jingpule ba ka sorkar India kan kyrshan lyngba kata ka mang pisa ba la tip kum ka Scholarship lane ka Education Loan.
Kane ka web portal ka don ruh ïa ka bynta ba kyrpang ban ai jingnang jingstad kyrpang ïa ki samla kynthei bad lyngba kata ka Employment Sectioin ka ïarap ruh ban tip shaphang ka wad kam wad jam bad pyntip ïa ki kam kiba lait post bad don ki lad jinghikai bapher bapher ban pyntbit ïa ki samla pule ka thaiñ Shatei Lam Mihngi khnang ba kin lah ban ïa bud rynkhi bad kiwei ki samla ba la paw ha ka ri bad ha ka pyrtehi hi baroh kawei.
Shuh shuh, na ka liang u Deputy Commissioner ka Ri Bhoi u la pyntip paidbah ruh na ka bynta ki khun samla ba lada ki kwah ban tip kham bniah shaphang kine ki Web Portal ba la mang kyrpang na ka bynta ki samla ka thaiñ Shatei Lam Mihngi ki lah ruh ban wad lyngba ka website ba la tip kum ka www.advancingnortheast.in
