Shillong, Jymmang 25: U Myntri Rangbah ka Jylla Conrad Kongkal Sangma u pyntip ba shen ma u lem bad u Myntri Rangbah ka Assam Himanta Biswa Sarma, kin sa sdang noh shen ïa ka ‘Phase-II’ (kylla ba-ar) jong ka jingïakren ban pynbeit noh ïa ki jingïakajia ha ki hynriew tylli ki jaka khappud ba dang buhteng.
Haba pyntip ïa kanne, u Conrad Sangma ula ong “Ngi la ïakren bad ngi ju ïakren para mangi hynrei ngim shym la ïohpor namar ki ka jingdon bun ki kam bad ka Assam ruh ka dang don ki elekshon ban wan. Hadien ba dep kine kiei kiei, nga kyrmen ba ngin sa lah ban pynsdang biang ïa ka jingïakren pynbeit pud ha ki jaka ba dang sah”.
Halor ka jingkynnoh u Nongïalam ka Liang Pyrshah Dr Mukul Sangma ba ki Party ba iatreilang ha ka sorkar MDA ki shu sngap jar pyrshah ïa ka MoU ba iasoi bad ka Assam ban pynbeit ïa ki hynriew tylli ki jaka ba ïakajia, u Conrad ulng ong “ La ka dei ka jingpynsngap jar lane ki pynpaw da ka mynsiem ba ki mynjur ïa ka MoU, u Dr Mukul um shym la iadonlang ha ka jingïalang”.
U Conrad ula ban jur “Kumba nga ong bad ju ïai ong ba ki paralok jong ngi kila iadonlang beit bad ngi bad kila iadonbynta lang ha ki Regional Committee. Kila ïohi ïa ka jinglong jingman bad ki lynti ba ki ïaid, ki tip ïa ki jingshi sha bad ki tip kumba ngi pyntyllun ïa ka kam. Kim don dak jingkylli bad kila kmen shibun ïa ka MoU”.
Haba pynthikna ba ka jingbishar biang ïa ka MoU kan nym jia satia, u Myntri Rangbah ula ong “Ngi la jam sha khmat bad kane ka soskular”. Ula ong ba un da kmen shi katdei eh ban ïakynduh ïa kito kiba pyrshah ïa ka MoU.
