Pyntip shwa sha ki bor shnong bad pulit, kyntu u RS Pilangkata ïa ki briew ba wan na Manipur

Nongpoh, Jylliew 20 : Kum ba ka jingïakynad jaid bynriew hapdeng ki jaid bynriew Meitei bad ki jaid bynriew Kuki ha ka jylla Manipur ka la ktah ïa ka shongsuk shongsaiñ bad la poi ruh u pud haduh ba ïa kylla umsnam hapdeng kitei ki jaid byrniew ha Manipur, u Rangbah Shnong ka Shnong Pilangkata ha Ri Bhoi mynta ka sngi u la kyntu ïa kino kino ki jaid byrniew na Manipur kiba wan ban phet rieh sha katei ka shnong ki dei ban pyntip sha ka bor shnong bad khamtam sha ki bor pulit khnang ban nym mih kano kano ka jingktah ïa ka shongsuk shongsain ki paidbah nongshong shnong.
Kum ban pynpaw paidbah ruh, na ka daw ka jingdon katei ka jingïakynad hapho ka jylla Manipur, kiba bun ki nongshong shnong na katei ka jylla ki la wan phet rieh sha katei ka shnong ban sah shuwa shi por bad kiba haing hasem jong kiba kiba shong basah ha Pilangkata bad kiwei kiwei ki shnong ba marjan, kaba dei na ka daw ba ki la wan phet ruh na ka daw ka jingjur ka jingïakynad jaid bynriew ha ka jylla Manipur.
Haba ïa kren bad ki Nongthoh Khubor mynta ka sngi, u Rangbah Shnong ka Shnong Pilangkata ha Ri Bhoi, u Bah Besterfield Shylla, u la ong ba ha kine ki sngi la don ki jaid byrriew na Manipur ki la wan ban rieh tngen shipor ha katei ka shnong bad kum ka shnong pat kam shym la pyrshah bad ka kyntu ba ki dei ban pyntip sha ki bor shnong bad ki bor pulit khnang ban nym mih kano kano ka huri hura halor katei ka jingwan poi jong ki ban phet rieh ïa lade na ka ka jingïakynad ha ka jylla Manipur.
U la ong ruh ba kum u Rangbah Shnong ka Shnong Pilangkata, u Bah Besterfield Shylla u la ïathuh ba u la dep ruh ban ïa kynduh ïa ki nongïalam ka HMAR Community bad ka Zomi Welfare Association ban ïa kren halor ka shongsuk shongsain ki paidbah na ka jingwan poi jong ki ha katei ka shnong bad kane ka jingwan sah jong ki ha katei ka shnong kam dei ban ktah ïa ka shongsuk shongsain ki paidbah nongshong shnong ha kaba ki hap ban pyntip shuwa sha ka bor shnong bad ki bor pulit khnang ban lah ban leh ïa kaba donkam hapoh ka shnong ka thaw.
U la buh ruh ïa ka jingmana ïa ki nongshong shnong ba kim dei ban ai jaka rieh ne khot ïa kino kino kiba wan na katei ka jylla khlem ka jingtip ka bor shnong bad ki bor pulit bad lada ki leh ïa kata lada jia ba mih kano kano ka huri hura ki hap hi ban shim ïa ka jingkitkhlieh.
Namar kata, u la bynrap ruh ba kum ka bor shnong halor kane ka jingwan poi kitei ki jaid bynriew sha ka shnong ki la pynlong ïa ka jingpeitngor bad u buh ruh ka jingkyrpad ba kan nym dei ban don kano kano ka huri hura ha shnong ha thaw bad tang kito kiba la ioh bor na ka shnong bad na ki bor pulit ki lah ban wan sah shipor katba dang bteng katei ka jingïakynad ha ka jylla Manipur, u la bynrap.