Pyntip lada don kino kino, kynthup u Chairman FC ïa ki nongïoh khaw rashon

Shillong, Rymphang 21 : Ka ophis treikam jong ka Deputy Commissioner (Supply), South West Garo Hills District, ha ryngkat ka jingïatrei lang bad ka Meghalaya State Food Commission, Shillong, ka la pynlong ïa ka Regional Camp ha Ampati ban pynkhlain ïa ka ka jingpyntreikam ïa ka National Food Security Act (NFSA).
Ha kane ka jingïalang la donlang ruh naduh ka Deputy Commissioner jong ka District, ka Anendya Raajsshre, IAS bad ruh u Chairman ka Meghalay State Food Commission, Bah DP Wahlang, IAS (Retd) nalor kiwei kiwei ki heh sorkar.
U Chairman ka Commission haba kren ha kane ka jingïalang u la ban jur ba ka thong jong ka Commission ka long ban pyntikna ba yn ym don mano mano ruh kiban shah pynduh ban ïoh ïa ka marbam.
U la pyntip ba kane ka dei ka Regional Camp kaba ar jong kane ka snem, ha kaba la buh ban pynlong sa kawei pat ha Shillong ha u bnai ban wan. Ka Commission ka la peit ruh ïa ka jingpyntreikam ïa ki skhim sam mar bam lyngba ka tnad Food & Civil Supplies, ka tnad Pule Puthi bad ruh na ka tnad ka Social Welfare.
Lyngba ka jingsam khaw rashon, ki longiing ba don ïa ka card Antyodaya Anna Yojana (AAY) ki ïoh 35 kilo u khaw ha ka shibnai, katba ki longiing ba ïoh ïa ka card Priority Household ki ïoh 5 kilo u khaw shi khlieh briew khlem jingsiew ei ei.
U Chairman u la ban jur ruh halor ka jingdonkam ban pyntikna ïa ka jingbha ki marbam bad ka jingïoh kumba ka dei ki dukan rashon lane ki Fair Price Shop bad kyntu ïa ki nongïoh jingmyntoi ba kin pyntip lada don jingeh sha ka District Grievance Redressal Committee, kaba lah ban poi wat sha ka sha ka Commission lada ym lah ban pynbeit.
La ong ruh ba lyngba ka PM POSHAN, la banjur ïa ka jingbam Mid-Day Meals kaba man ka por bad kaba khlem jingsiew ha ki skul, ryngkat bad ka jingkyntiew ïa ki kper thung jingthung. La pynshlur ruh ïa ka jingai jingbam ba tei lyngba ki Anganwadi Centre na ka bynta ki khynnah, ki longkmie ba armet bad ki longkmie ba dang ai buin ban pynduh ïa ka jingduna snam bad ka jingbym san ki khynnah. U Chairman u la pynpaw ïa ka jingdonkam ban pynthikna ba ki jingmyntoi kin poi sha ki jaka ba jngai bad kyndong tam.
Na ka liang u Meghalaya State Food Commissioner, Member Secretary, Bah IW. Ingty, IAS (Retd.) u la ïathuh ba ka Commission ka buddien ïa ka jingpyntreikam ïa ka aiñ, ka tohkit ruh ïa ki jingpynkheiñ aiñ, ka bishar ïa ki jingujor pyrshah ïa ki District Grievance Redressal Officer bad ka don ïa ka bor kaba ïaryngkat bad ka ïingbishar paidbah haba tohkit ïa ki jingujor.
Ki ophisar ki la pyntip ba hapoh ka TPDS, ki don 70,198 tylli ki longiing AAY bad 3,51,358 ngut ki Priority Household kiba ïoh jingmyntoi ha Meghalaya. Ka ICDS bad Supplementary Nutrition Programme ka ai jingmyntoi ïa palat 4.27 lak ngut ki khynnah bad da ki hajar ngut ki longkmie bad ki khynnah kynthei kiba dang khie samla, katba ka PM POSHAN Scheme ka kynthup ïa ki 11,078 tylli ki skul ha kylleng ka Jylla.
La ïoh ruh ïa ka jingpynshai na ki ophisar na Ampati, Tura, Williamnagar, Baghmara, Resubelpara bad Daddengre halor ka jingbud ryntih ïa ka E-KYC, ka jingpyntreikam ïa ka NFSA, ka jingpynïaid ïa ka supply chain management, ka jingtreikam da ka card rashon bad ki hok na ka PDS.
La pynphuh shuh shuh ïa ka prokram da ka jingshad Wangala na ka Ampati A’chik Cultural Society. La sam ruh ïa ka khusnam ha kane ka sngi sha ki nongsam khaw rashon kiba leh hok tam ha ka kam ne ka Best Performing Fair Price Shop dealer.
Ka jingïalang ka la wai da ka jingkular ba ka thong jong ka jylla ka long ban pyntikna ba yn ym don mano mano ruh ba shah pynduh ïa ka hok ban ïoh ïa ki marbam.