Shillong, Nohprah 11: Ka ïing Bishar High Court jongka jylla ha ka sngi Balang, kala hukum ban pyndep noh ïa ka jingmaramot ïa ka bynta ba 45 na ka 102/225 km jong ka surok National Highway (NH-06) hapdeng ka Jowai bad Ratacherra.
Na kane ka bynta jong ka surok, 5 km ka dei kaba la jubor bha ka jingsniew.
Ka Iingkashari, ha ka 6 tarik Naiwieng, kala hukum ia ka National Highway Authority of India (NHAI) ban maramot kyrkieh noh ïa kane ka surok ba 5 km khnang ba kan pynaram ïa ka leit ka wan ki kali.
Ha ka sngi Balang, ka NHAI kala pyntip sha Iing Bishar ba haba pyntreikam ïa ka hukum ka Iing Bishar ka kompani kala maramot kyrkieh mynts ïa kane ka surok ba 5 km bad kular ban pyndep ïa ki kam ba sah hapoh u Lber 2025.
U K Khan, AAG ba mihkhmat ïa ka Jylla, ula pyntip ba ka Sorkar kala ai ïa baroh ki jingïarap sha ka NHAI ban pynthikna ïa ka jingïaid beit jong ki kali hapdeng ka jingmaramot ïa ka surok.
Hadien ba shong bisahr ïa ka PIL bala mudui da u Advocate Kynjaimon Amse (Bam Kwai ha Dwar U Blei), ka Iing Bishar ba kynthup ïa u Chief Justice IP Mukerji bad Justice B Bhattacharjee kala ong “Halor kine kiei kiei, ngi bthah ïa u S Panthi, Amicus Curiae ban leit jurup ïa kane ka surok sniew ba 5 km bad ai ïa ka kaiphod ba lyngkot hashuwa ka jingwan rah biang ïa ka mukotduma sha ka ïing Bishar haba ïadei bad ka jingpyntip u S Sengupta (nongïasaid ka NHAI) ba ka jingmaramot ïa kane ka bynta jong ka surok ka dei kaba la dep”.
“Ngi bthah ruh ba ka jingmaramot ïa kaba bynta ba sah jong ka 45 Km ka dei ban bteng ha ka ban pyndep noh kumba la kular da u S Sengupta. Ka Sorkar Jylla ka dei ban ai ïa baroh ki jingkyrshan sha ka NHAI ban lah pynïaid beit ïa ki kali ha ka por ba ïaid ka jingmaramot” kala ong.
Ka ïing Bishar kala buh ban shong bishar biang ïa kane ka mukotduma ha ka 5 tarik u Rymphang, 2025.
