Shillong, Rymphang 17: Ka sorkar Meghalaya kan ïaid shakhmat bad ka Detail Project Report na ka bynta ka wate supply scheme kaba kynthup ïa ka shnong Mukhap-Mokaiaw bad ka shnong Motyrshiah kaba hap hapoh ka Mokaiaw constituency, la ong u Myntri Sokar ba peit ïa ka tnad Public Health Engineering u Marcuise N Marak ha ka ïing dorbar ha ka sngi Ba-ar.
Ki bynta ba kongsan jong ka projek kin kynthup ïa ka jingtei ïa ka dam bad ka water treatment plant.
“Ïa ka DPR yn sa pynkhreh mardor ynda la ïoh ïa ka jingbit halor ka jingdonkam ïa ka clearances,” ong u Marak haba jubab ïa ka jingkylli na u nongthaw aiñ ka UDP u Nujorki Sungoh.
U Bah Sungoh u la iathuh ha ka ïing dorbar ba ka constituency jong u ka ïa kynduh ïa ka jingeh ha ka umbam umdih man la u snem.
“Nga la buh ïa kane ka jingkylli namar ba ngi ïa kynduh ïa ka jingeh namar ka jingkyrduh ha ka umbam umdih man la u snem, haduh mynta kane ka jingeh ka dang don”, u la ong haba kylli hato ka sorkar ka dang bishar ïa kane ka jingtyrwa. U Marak u la jubab “hooid”.
Da kaba pynbor ban buh por, u Sungoh u la pynthikna ïa u myntri ba ka jaka kan ym long ka jingeh.
Hynrei na ka liang jong u Marak u la ong ba ka tnad ka dang ïai ap ban ïoh ïa ka jingbit.
“U executive engineer u la khot ïa ka jingïalang na ka bynta ka kam jaka, hynrei haduh mynta ka tnad kam pat ïoh jaka, nga kyrpad ïa u dkhot ban buddien bad phah ïa ka no-objection certificate sha ka tnad”, u la ong.
U Sungoh u la jubab ba ki bor synshar shnong ki la dep ban ai ïa ka jingkular ka jong ki.
“U Rangbah Shnong uba dei u khlieh nongsynshar u la pynthikna bad ngin sa pynbeit ïa kaba donkam na ka bynta ka jaka”, u la ong.
