Pyntikna u Conrad ba ka sorkar ka dang leh tyngeh ban pyndep ïa ka jingker sainar ha khappud

Shillong, K’ Lyngkot 15: U Conrad K Sangma uba dei u myntri rangbah ka jylla ha ka sngi Palei u la pynthikna ba ka sorkar ka dang leh tyngeh ban pyndep ïa ka jingker saisar shiah ha shilynter ka khappud bad ka ri Bangladesh.
Haba kren sha ki lad pathai khubor, u Sangma u la ong ba ka sorkar India ka dang ïai buddien ha kaba ïadei bad kane ka mat.
“Ngi dang ïaid shakhmat halor kata ka bynta bad nga kyrmen ba kiei kiei ki dei ban pyndep kloi”, la bynrap u Sangma.
U Sangma u la kdew ba kumba 40 km na ka jingker kaba 440 km ka dang sahteng, da ki mat kum ka jingsngewkhia ïa ka jingbun briew, ka jingshim jaka, bad ki case ha ïingbishar kiba khanglad ïa ka jingïaid shaphrang.
“Ngin dang shim ïa ki sienjam kiba donkam… Nga khmih lynti ïa kata shen namar kumba nga la ong, don napdeng jong ki kiba don wat ki case ha iingbishar, khamtam eh ïa ka bynta jong ka West Jaintia Hills, kaba dei kaba heh tam, kaba la iehnoh khlem jingker”, u la ong.
Haba pynksan ïa ka jinglong husiar bad peitngor bha jong ka jylla halor u pud u sam bad ka Bangladesh, u CM u la ong, “Ka sorkar Meghalaya, ki BSF bad baroh ki tnad treikam (agency) ki long kiba husiar bha.”
U la pynpaw ïa ka jingialang bishar bniah kaba la long ha ka 24 tarik u Nohprah, 2025, bad ki tnad bapher bapher, kynthup ïa ki BSF bad ki IB, ban ïakren ïa ka jingpahara khappud.