Pyntikna u Bah Prestone ba kan ym shim por ïa ki Pulit ban lap ksai ïa kiba donkti

Shillong, Risaw 09 : U Symbud Myntri Rangbah ka Jylla Bah Prestone Tynsong ha ka sngi Balang u la pyntip ba ki la thaw da ka Special Investigation Team (SIT) na ka bynta ban tohkit halor ka jingïap jong u heprit ba dang 7 snem da kaba kular ruh ba ka tnad kan pyntikna ba kan shim por ïa ka tnad ba kin lap ksai ïa kiba donkti ha katei ka kam ba shyrkhei.
“La thaw ïa ka SIT hapoh ka jingialam jong u SP ka East Khasi Hills bad ka jingtohkit halor kane ka dang ïaid shakhmat,” ong u Symbud Myntri Rangbah haba kren bad ki lad pathai khubor.
Shuh shuh u ong ba kum ka sorkar ki kwah ban pyntikna sha ki paidbah ba shen kin sa lah ban kem noh ïa ki runar ba donkti ha katei ka kam bad pynkut syndon ïa ki kam runar.
Kumban shu kdew hangne, ïa ka met jong u heprit Kyrshanbor Kharmudai uba la pynbna paidbah ba u la jah noh na iingsah jong u na Nongrah ha ka janmiet sngi Balang, la lap noh pat ha ka step sngi Palei na Mawpat.
U Bah Prestone u la ong ruh ba ïa mynta hi ki dang ap ïa ka post-mortem watla ki suba ba kane ka dei ka jingshah pynïap.
Ha kajuh ka por u Symbud Myntri Rangbah u la ong ruh ba kum kine ki jingjia ym dei than ba ki paidbah kin kynnoh ïa ka sorkar namar ki kam runar ki lah ban jia sha kadiang sha kamon ha kaba ki bor pulit kim lah satia ban tip lypa hangno kan jia bad lano kan jia.
Kumta u la kyntu jur ïa ki kmie ki kpa bad ki nongshong shnong ba kin long barabor kiba peitngor lypa ïa la ki khun ki kti bad ban ym ailad ba ki khun kin jah.