Nongpoh, Naiwieng 15: Ka kong Evalyni Kharbani kaba dei ka kyrtong jong ka HSPDP ka ban ïakhun ha kane ka elekshon ban wan naka party HSPDP hadien ka jingud jingnam jong ki paidbah ka thaiñ Khlieh Umwang naka jingsniew palat jong u surok kala mih shakhmat ban pyntih bad pynbha ïa u surok kali ban poi sha katei ka shnong kaba ki paidbah kila ap khmih lynti mynta da ki bun phew snem naka sorkar ba kan phai khmat.
Katei ka jingbym shimkhia ka sorkar ka long kum ka jingiehnoh khunswet ïa ki nongshong shnong ha Khlieh Umwang, khamtam ka jingbym don ka surok kali kaba biang ban kit ban bah ïa ki mar ki mata ha ka por lyiur bad khamtam ha ka pang ka shitom ba wat ki kali kit nongpang ki kyntaid ban leit sha katei ka shnong namar ka jingsniew palat jong u surok kaba buh jingeh ruh wat ïaki khynnah ban poi sha ki jaka pule.
Kum ki paidbah bad ki nongïalam shnong jong katei ka shnong kila ju khmih lynti la bun snem naka sorkar ba kan phai khmat ban pynpoi surok sha katei ka thaiñ, hynrei katei ka jingangnud jong ki kala kut tang haka jingphoh sniew.
Hynrei kila pynpaw ka jingsngewnguh ïaka kong Evalyni Kharbani kawei naki longkmie kaba don ka jingkitkhlieh bad dei lyngba ka jingkyrpad jong ka Village Organisation ha katei ka shnong, katei ka longkmie khlem da pynslem kala kner ki kti jingïarap naka bynta ka jingdonkam ki paidbah nongshong shnong ban pynpoi surok naka bynta ka jingbit jingbiang jong ki paidbah haka leit ka wan.
