Shillong, Jylliew: Ka Seng Hynñiewtrep National Youth Movement Central Body (HNYM-CB) ha ka12 tarik mynta u bnai kala ïoh ban pyntiansmai ïa ki phew ngut ki nongïalam bad ki dkhot ha ka jingpynïar shnat treikam jong ka da kaba pynkha ïa ka ïa HNYM Mylliem Zone.
ïa kane ka jingïalang pyntiansmai la pynlong ha Mylliem Bah Guest House ha kaba la ïadon ryngkat lang ki nongialam jong ka HNYM Central Body kiba kynthup naduh ki arngut ki Vice President, U Bah Pyrkhatlang Nongphlang bad u Bah Marshall Nonglait, u Bah Donald Syiemlieh Working President, u Bah Meddystone Kharsynteng Vice President HNYM Mawlai Mawiong Unit uba dei ruh u dkhot jong ka CEC, u bah Living Syiem, Publicity Secretary Mawlai Mawiong unit bad u Bah Arnold Mawlong Finance Secretary Mawlai Mawiong unit.
ïa kane ka jingialang la pynïaid da u Bah Tailanstar Lyngkhoi Chairman Anti Influx Cell HNYM CEC, bad la ïoh ruh ka jingsneng jingkraw na ka bynta ki nongïalam bad ki dkhot jong ka Mylliem Zone da u bah Marshall Nonglait Vice President Central body bad kumjuh ruh na u Bah Meddystone Khar synteng kiba la kyntu ba ki dei ban long ki nongïalam bad ki dkhot kiba u paidbah u lah ban shaniah bad khamtam eh ba kin don ïa ka mynsiem lenlade na ka bynta ka jingbha jong ka Jaidbynriew, watla ki hap ban ïatyngkhuh ïa shibun ki jingeh ha ka jingïaid lynti kum ki khlawait jong ka Jaidbynriew.
Nalor kata la ïoh ruh ka jingkren bad ka jingsneng jingkraw na u President Barangbah duh jong ka Seng u Bah Louis Dohtdong uba la pynshai ïa ki mat treikam jong ka Seng, da kaba ong ba ka Seng HNYM hi ka ïeng ban ïada ïa ka khyndew ka shyiap, ka synshar khadar trai ri bad ban pynneh pynsah ïa ka ktien ka thylliej kiba dei ki lai tylli ki mawdong ban pynneh pynsah ïa ka snap bakyrpang jong ka Jaidbynriew.
