Shillong, Risaw 08 : Ha ka jingïalang ba la pynlong ha ka Lah Sngi U Blei, ka Meghalaya Cricket Association lyngba ka Apex Council jong ka, ka la pynthymmai ïa ka thup ki dkhot ka kynhun ïalehkai ka jylla (Meghalaya) na ka bynta ka samoi lehkai 2024-25 ha ka Ranji Trophy.
Ka jingjied ïa ka kynhun ïalehkai jong ki shynrang kiba la kham rangbah ka dei na ka bynta ki ar tylli ki jingïalehkai ha ka Ranji Trophy ba nyngkong jong kane ka samoi bad kane ka thup ka lah ban kylla ha ki jingïalehkai ba hadien katkum ka jinglah lehkai bha jong ki player.
Ka jingïalehkai kaba nyngkong jong ka Meghalaya ha ka Ranji mynta ka samoi kan long pyrshah ïa ka Services shabar nala ïing, ban sdang naduh 11 tarik haduh 14 tarik Risaw, shuwa ba ka kynhun kan wanphai hala ïing ban aireng pyrshah ïa ka Tripura naduh 18 haduh 21 tarik Risaw ha Shillong.
Kumban shu pynkynmaw, ka Meghalaya ka la ïohrung sha ka Elite Group mynta ka samoi hadien hadien ka jingïakhun kaba seisoh ha ka Plate Group ha ka samoi lehkai 2023-24, ha kaba ka kynhun ka la poi kyrdan ba ar (runners-up) hadien ka Hyderabad.
Ka kynhun kan bteng ban hap hapoh ka jingïalam jong u Kishan Lyngdoh kum u kapten, bad u Dippu Ch Sangma kum u symbud kapten.
Ka thup ki player ka Meghalaya ba la pynthymmai (na bynta ki ar tylli ki jingïakhun ba sdang jong ka Ranji Trophy) ki long: Aryan Borah, Akash Kumar Choudhary, Shembhalang Pyngrope, Bamanbha Shangpliang, Bijon Dey, Chengkam Sangma, Dippu Sangma (V-C), Jaskirat Singh Sachdeva, Kishan Lyngdoh (C), Ram Gurung, Roshan Warbah, Swarajeet Das, Ajay Duhan (BCCI approved guest professional player), Sumit Kumar (BCCI approved guest professional player), Anirudh B (BCCI approved guest professional player)
Standby: Adarsh Joshi, Anish Charak, Lerry G Sangma, Yogesh Tiwari
Support staff : Prabhakar Bairgond (Head Coach), Moisten Ch Marak (Assistant Coach), Surojit Biswas (Physio), Vikash Singh Chauhan (Trainer), Dister Marbaniang (Manager).
